ANIVERSARIU BOMBEIROS BA DALA XVI, LONGUINHOS HUSU MANTEIN PROFESIONALISMU

Ministru Interior (MI), Longuinhos Monteiro liu husi aniversariu Bombeiros ba dala XVI (16) (2000-2016) ne’e nia husu ba ekipa Bombeiros hotu atu mantein nafatin servisu ho profesionalismu ne’ebe maka durante ne’e la’o tiha ona.

MI kongratula ba servisu Bombeirus, tamba durante ne’e laiha keixa ruma husi institusoens no komunidade sira konaba servisu Bombeirus nian.

“Purkazu to’o agora laiha lamentasaun ida ha’u rona konaba komportamentu tantu pesoal, tantu professional servisu bombeirus nian, ita tenke iha espransa mantein no garante doutrina ida ne’e tau iha imi neon no hahalok,” Longhuinhos Monteiro hato’o lia hirak ne’e liu husi diskursu wainhira partisipa komemorasaun ejistensia Bombeirus ba dala 16 ne’ebe hala’o iha edifisiu Bombeiros Caicoli-Dili Segunda (25/04/2016).

Tamba ne’e, Longuinhos husu ba funsionariu operasoins Bombeirus tomak atu bele kaer metin doutrina ida ne’e, tamba doutrina ne’ebe maka diak Bombeirus bele garanti ninia prezensa iha tereinu.

“Doutrina ida ne’e maka ita bele garante ita ninia prezensa, ita nia profesionalismu dedikasaun iha servisu ida ne’e,”haklaken Longhuinhos.

Iha aniversariu refere MI husu ba komandante Bombeirus sira atu responsabiliza ba komportamentu servisu pesoal bombeirus nian iha vida pesoal no vida professional.

Tamba servisu Bombeirus nian iha serteza ida ne’ebe paz futuru ida ne’e maka servisu nasional Bombeirus mehi iha ninia doutrina iha ninia kumprimisiu atu servi povu no nasaun.

Iha fatin hanesan, Direktur Jeral servisu operasionais Bombeiros, Domingos Pinto haktuir, oras ne’e dadauk membrus bombeirus hamutuk ema nain 370 ital maka ejerse ninia funsaun hodi interven kestaun natureza no teknologia nian.

Nia dehan la’os deit ba parte natureza nian deit maibe bombierus mos akompanha teknologia ne’ebe modernu hanesan ema barak uja gas no serkuita elktresidade ruma, no iha grupo bombieru task force ne’ebe prontu atu interven.

“Ita mos lansa ona grupo intervnesaun ida nia kuartel lokaliza iha Comoro, grupo ne’e bele intervene iha teritoriu Timor laran tomak hanesan munsipiu balun presija apoiu sira prontuinterven, ”afirma nia.

Tantu iha oportiunidade ne’e nia dehan, Bombeiros sei kontinua infrenta Problemas balu hanesan, kareta tanki nian ne’ebe sei limitadu inklui telefone komunikasaun nian.

“Dezafiu ne’ebe maka korpu Bombeiros sempre hasoru maka falta fonte bee,  e difikuldade ida tan maka konaba kareta tanki bee ninian tanba iha rua deit hanesan tanki ida ho litrus 10.000 no ida fali tan ho litrus 5000 ne’e la to’o tanba kareta ida tiru bee kada minutu litrus 1000 resin, nune’e litrus 5000 ne’e minutes 50 hotu ona, e dezafiu seluk maka sistema komunikasaun seiduak diak purke ita uja deit maka telefone bai-bain,”esklarese Domingos Pinto.

Diretor Jeral Servisu Operasionais Bombeiros ne’e haktuir katak, ho tinan Bombeiros ne’ebe aumenta  ne’e fiar sei hala’o ninia knar profesional liu tan.

“Ha’u hanoin Bombeiros hala’o ninia knar tinan XVI  ona, nune’e ha’u bele hateten katak, hanesan ema ida karik korpu Bombeiros komesa bo’ot ba dau-dauk ona no tama ona ba idade klosan nian ou adolosente, ne’ebe ita hein katak ba oin bele servisu diak liu tan no servisu professional liu tan,”afirma diretur jeral Bombeiros. Eus/Ves

Jornal Nacional