KOMISAUN B KESTIONA ATUASAUN PNTL – ISABEL FERREIRA:“KALAN LABELE SAI HUSI UMA”

Prezidente Komisaun B Parlamentu Nasional (PN) ne’ebe trata asuntu Defeza, Seguransa no Negosiu Estranjeirus,  David Dias Ximenes, kestiona maka’as atuasaun Polisia Nasional Timor Leste (PNTL) ne’ebe garante seguransa ba povu maibe baku povu to’o tasak didiak.

“Hau lahatene seguransa atu asegura saida? komisaun B koalia bebeik ona kona ba ida ne’e, hau sempre dehan Polisia laos funsionariu publiku sira servisu enturmus, Sabado ho Domingo ita bo’ot sira bele lao la iha Polisia, kalan mos la iha ona Polisia, ema hana malu, tuda uma,”hateten Deputadu David Dias Ximenes iha PN, Tersa (26/04/2016).

Nia hatutan Polisia ba ema hotu-hotu, laos ba ema ida nia gostu, kuandu la hatene dehan la hatene, lalika tur iha neba, agresaun fizika kuaze lor-loron.

“Buat nebe ema relata lor loron iha komisaun B neba ne’e, ami atu koalia halonusa, haruka prosesu ne’e ba Komandante Jeral, ema diak hela, balu responde ami maka investiga ne’e diak hela maun, hau dehan bebeik Komandante sira ne’e tenki troka,”  afirma Deputadu David Mandati.

Iha fatin hanesan Deputadu Manuel Gaspar hatete lolos ema sente seguru kuandu iha Polisia maibe agora ne’e kuandu Polisia iha ema sente la seguru tamba Polisia tun sempre ho violensia.

“Hau koalia ne’e tamba boa vontade Polisia nian ka oin profesional Polisia nian maka ne’e ka, hau hanoin ida ne’e presiza tau etensaun ba Komandante sira tamba dala ruma Komandante sira maka laiha boa vontade atu fo orientasaun adekuadus ba nia membru sira,” hateten Deputadu Manuel Gaspar.

Labele sai husi uma

Iha parte seluk, Primeira Dama, Isabel Ferreira husu ba joven hotu iha Dili laran atu labele sai husi uma iha tempu kalan, tanba iha grupu balun mak hakarak atu estraga estabilidade povu Timor Leste (TL) nian iha tempu kalan.

“Ita triste oituan, tanba joven sira, li-liu iha semana rua liu ba, joven ida hetan hana husi ema deskoñesidu. Tanba ne’e ita husu ba familia sira hotu atu fó atensaun ba nia oan sira, li-liu kalan labele sai husi uma,” informa Isabel Ferreira ba jornalista sira iha Palácio Prezidensial Aitarak Laran Dili, Tersa (27/04).

Isabel Ferreira dehan, inan aman sira tenke fó atensaun ba oan sira hodi haruka sira hakmatek iha uma iha tempu kalan atu estuda hodi hanoin ba sira nia futuru.

Inan nasaun ne’e dehan, problema ne’ebé ikus-ikus ne’e mosu iha rai laran ne’e, la hatene mai husi grupu ida ne’ebé, maibé atu sobu estabilidade povu TL nian.

“Ita la hatene, husi rai laran, i ita nia fronteira mós livre lós, ita la deskonfia, mas di’ak liu kuidadu, prevensaun ida di’ak liu mak labele sai husi uma,” dehan Isabel Ferreira.

Primeira Dama mós husu ba Polisia Nasionál Timor Leste (PNTL) atu halo patrullamentu iha fatin sira ne’ebé mak identifika hanesan risku ba ameasa sira hanesan ne’e.

“Fatin sira hanesan ne’e, labele ba dala ida de’it, mas sé bele intensivu liu tan, para ema ne’ebé hanoin atu halo aat mós, bele sente ta’uk, tanba iha seguransa di’ak,” dehan Isabel Ferreira.

Isabel Ferreira dehan, ba bairu sira ne’ebé mak identifikadu ba ameasa sira hanesan ne’e, tenke haforsa seguransa ba bairu ne’e, maibé labele depende de’it ba Polisia ho F-FDTL.

“Ita mós bele fó seguransa ba ita nia bairu no ita nia familia, hanesan uluk siskamling,” dehan Isabel Ferreira.Nes/cos

Jornal Nacional