SQR FÓ BOLSA ESTUDU, BA FAMILIA KBI’IT LAEK SIRA NIA OAN

Sentru Quesadep Ruak (SKR), tinan oin sei fó bolsa estudu ba familia kbi’it laek sira nia oan sira, iha teritoriu Timor laran tomak ba liur no mós iha rai laran.

Primeira Dama, Isabel Ferreira informa katak, nia hamosu programa ida ne’e, tanba tuir realidade ne’ebé iha, povu kbi’it sira nia oan iha Timor Leste (TL) ne’e, oituan de’it mak kontinua sira nian estudu to’o iha universidade, tanba inan aman kbi’it laiha atu selu sira nian eskola.

“Mas iha ne’e ami eskoella área, ba tinan oin ami sei fó prioridade ba fakuldade edukasaun, tanba ita nia profesor sira barak mak atu reforma ona, entaun ita orienta mós ba povu nia oan sira ne’ebé mak hakarak eskola, entaun hili fakuldade edukasaun,” informa Isabel Ferreira ba jornalista sira iha Palácio Prezidensial Aitarak Laran Dili, hafoin enkontru ho Administrador sira husi Munisípiu 13, Tersa (26/04).

Nia rafirma, iha área enjeneria nian mós fakuldade ida ne’ebé di’ak, entaun bolsa estudu ida ne’e mós sei fó prioridade ba área ida ne’e.

Kritériu ba programa bolsa estudu ne’e, familia kbi’it laek ne’ebé mak seida’uk iha oan ida ba eskola tanba laiha rendementu, la simu pensaun ka subsídiu husi Governu hanesan pensaun veteranus, bolsa da mãe no la’os funsionáriu nia oan.

“Sé ita haree de’it ba notas, normalmente monu de’it ba ema riku no ema bo’ot nia oan, familia kbi’it laek nia oan ne’e, ita sura ho liman. Sé ita hakarak atu hadia ekonomia Timor nian, li-liu ki’ak, ita tenke investe iha edukasaun, entaun tenke hadi’a kritériu ne’e, nia kritériu mak, vontade hakarak eskola,” katak nia.

Isabel Ferreira esklarese, bolsa estudu ne’e ba povu sira ne’ebé kbi’it laek nia oan duni, ne’ebé nia oan ida seida’uk ba tuur iha universidade.

“Programa bolsa de estudu, hanesan ita hatene katak, iha tinan kotuk ita halo tiha ona enkontru ida ho autoridade lokal sira atu aprezenta sira nia kandidatu, ba joven sira husi familia kbi’it laek,” afirma Isabel Ferreira.

Nia esklarese, husi aprezentasaun kandidatu ne’e, hetan ona kandidatu 85, no husi kandidatu 85 ne’e, ema nain tolu nolu resin mak atu haruka ona ba Xiña. Maibé Isabel Ferreira dehan, tanba tarde ona, entaun tinan ida ne’e joven tolu nulu resin ne’e seida’uk bele ba Xiña, tinan oin mak foin bele ba.

Nia haktuir, Sentru Quesadep Ruak mós iha tempu badak sei asina MoU ida ho Universidade Nacional Timor Lorosa’e (UNTL), atu tinan-tinan Sentru Quesadep Ruak sei fó bolsa estudu ba familia kbi’it laek nia oan sira, iha territóriu tomak.

Alénde ne’e, Primeir Dama mós informa katak, iha enkontru ne’e mós, nia ho Administrador sira ko’alia kona-ba programa dolar ida ($ 1.00) ba futuru labarik sira nian.

“Ita konvoka enkontru ida ho Administrador Munisípiu tomak, atu ko’alia kona-ba programa ne’ebé mak ami sei hala’o iha tinan ida ne’e nia laran, hanesan programa dolar ida ba futuru. Ita lansa tiha ona programa ne’e iha fulan ida ne’e iha BNCTL,” dehan nia.

Maibé Primeira Dama dehan, lansamentu ne’ebé sira halo tiha ona ne’e, lansa ba funsionáriu sira nia oan de’it.

Tanba ne’e, Isabel Ferreira dehan, nia konvida Administrador sira husi Munisípiu tomak atu realiza enkontru ne’e hodi bele lansa tan programa dolar ida ba futuru ne’e iha Aldeia hotu iha Timor Leste (TL), li-liu ba populasaun kbi’it laek sira nia oan.

“Husi Aldeia ida sei aprezenta labarik nain rua (mane ida feto ida), i programa ne’e hanoin atu lansa iha loron 1 fulan Juñu, haree tuir númeru Aldeia ne’ebé barak mak iha Baucau, ne’ebé sei halo lansamentu ne’e iha Baucau,” katak Isabel Ferreira.

Nia esklarese, alénde programa dolar ida ba futuru labarik sira nian, Gabinete Primeira Dama nian mós hanoin ona atu fó bolsa estudu ba familia kbi’it laek sira nia oan.cos

Jornal Nacional