PR TAUR: POVU HOTU TENKI HETAN ELETRISIDADE

Prezidenti Repúblika (PR) Taur Matan Ruak hateten katak, projetu eletrisidade iha Timor Leste (TL) laran tomak ne’e, la’os veteranus sira nian para atu hadau malu, hodi impede fali povu nia direitu atu hetan eletrisidade.

Taur Matan Ruak dehan, kompañia veteranu sira ne’ebé hadau malu projetu eletrisidade ne’e, problema ne’ebé povu infrenta iha Timor laran tomak.

“Ha’u uluk dehan ba maun Xanana katak, maun Xanana, lei ida ne’ebe mak hateten katak, projetu eletrisidade ne’e, tenke fó deit ba veteranus, maun Xanana dehan, laiha tanba sira lahatene halo buat seluk ona, entaun fó netik buat sira henesan ne’e para sira mós bele moris,” informa Taur Matan Ruak.

Taur Matan Ruak mos konsidera hahalok veteranu sira ne’ebé hada’u malu projetu to’o tuku malu ne’e, halo moe de’it Estadu, tanba sira ema funu nain ba nasaun ida ne’e.

“Mas ha’u hakarak dehan ba veteranus sira hanesan ne’e, imi hakarak fahe osan ne’e halo nusa, fahe servisu halo nusa, ida ne’e kestaun imi nian, maibé ha’u nia hakarak ne’e, eletrisidade ne’e tenke to’o lalais povu,” relata Taur Matan Ruak bainhira diálogu ho komunidade iha Suku Rairobo, Postu Administrativu Atabae, Munisipiu Bobonaro, Kinta (31/03).

Taur Matan Ruak mós husu ba povu iha Suku refere atu pasiensia hodi hein sira nia eletrisidade tama ba sira nia Suku.

Entretantu komunidade Agostinho Maia hatete katak,  projetu eletrisidade ne’e to’o agora, suku refere seidauk asesu ba eletrisidade tanba, veteranus sira mak hadau malu atu kaer projetu eletrisidade.

Iha parte seluk, komunidade Suku Atabae, Postu Administrativa Atabae, Munisípiu Bobonaro, husu ba Governu atu monta liña elektrisidade iha sira nia suku laran, tanba to’o oras ne’e sira seida’uk asesu ba eletrisidade, i ejiji mós ba Governu atu tau matan ba sira nia estrada ne’ebé difikulta tebes sira nia movimentu.

Komunidade Armando, hatete katak, komunidade iha Suku refere kuaze aldeia 4 maka seidauk asesu ba eletrisidade.

“Durante ne’e ahi lakan ne’e ami senti di’ak oituan,maibé ami hano’in fali ba ami nia maluk populasaun balu sei moris iha nakukun laran hanesan uluk nafatin,” relata Aramando, bainhira bainhira dialogu ho Prezidente Repúblika (PR) Taur Matan Rauk, ho komunidade iha Suku refere, Kuarta (30/03).

Nia hatutan, eletrisidade, kondisaun estrada iha Suku refere mós a’at tebes hodi difikulta transporte públiku atu halo movimentu to’o iha Suku refere.

Alénde ne’e, komunidade Mario da Costa mós husu ba Governu atu hadia infraestrutura ne’ebé mak a’at iha sira nia Suku laran, atu nune’e bele fo benefisiu ba komunidade sira.

Hatan ba kestaun ida ne’e Prezidente Repúblika, Taur Matan Ruak hatete, povu iha Suku refere sei asesu ba eletrisidade, tanba maske sira nia dalan a’at mós, karet bele tama to’o iha ne’eba, hodi lori airing eletrisidade nian.

“Imi nia elektrisidade sei to’o, maibé sei lori tan tempu oituan, tanba hola parte 15% ne’ebé seidauk hetan, grupu ki’ik los, hau uluk sa’e Prezidenti fou-foun, 80% maka populasaun laiha elektrisidade, ha’u nia mandatu seida’uk hotu 85% pupulasaun iha elektrisidade, ha’u kontenti los,”dehan PR Taur Matan Rauk.

Xefe Estadu ne’e haktuir, agora dada’uk problema povu hakilar kona-ba eletrisidade ne’e se iha, maibé mensu ona, tanba hela 15% populasaun Timor Leste mak seida’uk asesu ba eletrisidade.cos

Jornal Nacional