SIKN PRENDE MAKINA JOGU ILEGAL IHA PORTU DILI

Polisia Nasional Timor Leste (PNTL) liu husi Departementu Servisu Investigasaun Kriminal Nasional (SIKN) prende makina jogu ne’ebe tama illegalmente iha Portu Dili.

SIKN prende makina jogu illegal hetan mandadu husi Ministeriu Publiku (MP) nune’e iha loron Kuarta(30/03/2016) halao kedas pasa revista ba kontainer ida ne’ebe nakonu ho makina jogu nian.

Husi ezekusaun ba kontainer illegal ne’e komanda dereita husi komandante SIKN Superintidenti Ludgerio Lay no akompanha ho membrus SIKN nian ne’ebe kompleta ho arma pistola no kilat staer ida.

Ezekusaun ba mandadu iha portu dili ne’e kuaze oras ida resin ne’ebe hahu husi lokraik tuku 16 : 30 Otl remata iha tuku 18 : 00 Otl.

Kontainer ho sasan illegal ne’e ho marka CAIU. U 9210 90 4, no SIKN asegura kedas ba kuartel jeral PNTL, Caicoli, Dili, nain ba kontainer ne’e husi sidadaun Xineza.

Iha intervista, Komandante SIKN Superintendenti Ludgerio Lay informa katak, SIKN hanesan ezkekutador hala’o tuir deit mandadu husi Ministeriu Publiko (MP) no Tribunal hasai.

“Ami hanesan ezekutador ami so halao deit saida maka Ministeriu Publiku fo no Tribunal fo,” hatete, Ludgerio Lay ba Jornalista sira iha Portu Dili, Kuarta (30/03/2016).

Nia esplika karta mandadu  MP haruka ne’e kompleta ona ho kazu ne’ebe maka iha, entaun prosesu hotu nain maka Ministeriu Publiko.

“Kontiudu kazu ne’e Ministeriu Publiko nian, ami so ezekuta deit ba kazu ne’ebe maka iha portantu kontiudu no prosesu tomak iha Ministeriu Publiko nia liman.” Nia dehan.

Tuir observasaun jornalista JN-Diario iha terenu nota katak antes SIKN atu loke kontainer  hodi atu hala’o pasa revista, iha haksesuk malu entre SIKN ho Alfandega, tanba laiha lisensa ba area ne’ebe SIKN halao pasarevista ba.

No tuir informasaun ne’ebe diario ne’e asesu tuir lista ba sasan iha kontainer ne’e dehan iha deit maka sasan elektronik, katak iha Lpatop, Komputer maibe realidade hatudu iha kontainer ninia laran iha fali makina jogu nian.Eus

Jornal Nacional