PR Taur: “Estadu Ita Hari Nee Laos Maupagador”

QUELICAI - Prezidente Republika (PR) Taur Matan Ruak hateten estadu neebe povu Timor Leste (TL) harii nee laos maupagador para la tau matan ba povu, maibe estadu kontinua tau matan ba povu no veteranus sira, tamba povu nia kontribuisaun makas too nasaun nee hamrik.

Lia hirak nee hatoo husi PR Taur, liu husi dialogu aberta ho komunidade Suku Laculio, postu Administrativu Quelicai, Kinta (26/05/2016).

Estadu Timor Leste neebe ita hari nee laos maupagador, maibe estadu no governu kontinua tau matan ba povu tomak, tamba nee hadia dezenvovimentu ba eletrisidade hetan susesu, selu pensaun ba veteranus sira no fo pensaun ba terseira idade no alezadu sira, tamba nee estadu la haluhan povu kontinua tau matan, maibe estadu laos halo buat hotu dala ida, tenki tuir faze pur faze,” hateten PR  Taur.

Xefi Estadu nee mos hatutan tan katak governu mos iha limitasaun, tamba nee sira servisu tuir sira nia kiibit neebe iha, tamba governu mos sempre torka malu kada tinan lima, Prezidente mos hanesan too ba Xefi Suku no Xefi Aldeia.

Iha fatin hanesan Veteranus Jacinto da Costa hateten veteranus sira iha suku Laculio no suku sira balun iha Postu Administrativu Quelicai, seidauk hetan pensaun husi governu, nee dalaruma governu haluhan ona sira, tamba sira iha area rurais liu. Informasaun kompletu iha STL Jornal no STL Web, edisaun Sabado (28/5/2016). Joao Anibal

Suara Timor Lorosae