Simeira hosi CPLP previstu ba Jullu bele adiadu pelumenus to'o tinan ne'e nia rohan - sekretáriu ezekutivu

Sekretáriu-ezekutivu hosi Komunidade Nasaun sira Lian Portugés (CPLP) admiti iha loron-sesta ne'e katak simeira hosi "nasaun sira" ne'ebé previstu ba fulan-Jullu karik adia tiha maibé nia garanti katak sei konkretiza "pelumenus to'o tinan ne'e nia rohan".

Murade Murargy indika ona katak krizi polítiku foun iha Brazil, ne'ebé kulmina iha loron-kinta ho afastamentu temporáriu hosi Prezidente Dilma Rousseff, bele iha implikasaun sira iha ajendamentu hosi simeira no sei kontakta lalai ho Prezidente interinu brazileiru, Michel Temer.

Murargy fó hanoin katak, to'o tinan ne'e nia rohan, aleinde krizi polítiku iha Brazil, sei halo mós Jogu Olímpiku sira, iha fulan-Agostu, sei iha mós eleisaun Prezidensiál sira iha São Tomé & Prínsipe no iha Cabo Verde sei iha mós eleisaun autártiku sira nian.

Sekretáriu-ezekutivu hosi CPLP fó hanoin katak simeira Uniaun Afrikanu (UA, iha fulan-Jullu) no instabilidade polítiku foun iha Guiné-Bissau, ne'ebé mosu iha loron-kinta bainhira Prezidente José Mário Vaz demiti Governu hosi Carlos Correia nian, ne'ebé simu pose iha fulan-Setembru 2015 liubá.

Simeira CPLP nian, entre tema sira seluk, sei hili prezidénsia foun ba komunidade nian, ne'ebé sei fó hosi Timor-Leste ba Brazil, nune'e mós sei substitui atuál sekretáriu-ezekutivu, no iha kandidatu úniku hodi troka maka antiga primeira-ministra no atuál governadora hosi Banku Sentral São Tomé & Prínsipe nian, Maria do Carmo Silveira.

"Sei la halo iha fulan-Jullu. Ha'u la fiar, tanba iha fulan-Jullu ita iha simeira hosi UA, ne'ebé iha ona loron markadu no xefe sira Estadu nian iha ona kompromisu. Hafoin ne'e ita sei iha eleisaun (prezidensial sira) iha São Tomé & Prínsipe no Jogu Olímpiku sira iha fulan-Agostu (iha Brazil)", nia fó hanoin.

Hahú fulan-Agostu "bele akontese iha momentu ruma", nia hatutan maibé fó hanoin katak eleisaun autártika sira (fulan-Juñu/fulan-Setembru) no prezidensial sira (iha fulan-Setembru/fulan-Outubru) iha Cabo Verde.

"Bele karik iha Cabo Verde laiha kondisaun sira hodi partisipa iha Simeira. Nune'e ita sei iha xefe Estadu na'in rua ne'ebé maka labele partisipa iha simeira, ne'ebé hanesan ladún di'ak", nia hatutan.

Nune'e, nia hatete katak husu ona foin lalais ne'e ba Prezidente kabu-verdianu nian, Jorge Carlos Fonseca, no nia sei halo konversasaun hanesan hahú loron-segunda, loron ne'ebé nia to'o iha Timor-Leste, ho prezidente timoroan, Taur Matan Ruak, hodi ko'alia nia homólogu sira liuliu ho prezidente brazileiru hodi marka simeira.

Kona-bá krizi brazileiru, Murargy lakohi ko'alia - "hanesan asuntu internu Brazil nian no ha'u lalika intromete" -, nia hatete de'it katak nia akompaña hela situasaun no tanba razaun ne'e nia hein atu Temer marka lalais loron ida ba simeira, nune'e sei kontakta nia iha tempu badak hodi felisita no fó hanoin nian kona-bá asuntu.

"Temer koñese di'ak CPLP, ne'ebé nia vizita ona no ha'u iha relasaun di'ak to'o mosu konfuzaun sira ne'e. Nia hatudu nafatin interese boot ba CPLP. Ha'u hein katak hetan estadu espíritu ida kalma no situasaun bele normaliza, hodi nune'e bele iha momentu ida hodi hanoin oituan iha simeira CPLP nian no hodi marka loron", afirma hosi sekretáriu-ezekutivu hosi komunidade luzófonu ne'e.

Ba Murargy, simeira "tenki" la'ó "iha ambiente dame no estabilidade ida" no iha prezensa maka'as hosi xefe sira Estadu no Governu nian, "tanba hala'o simeira ida ho auzente maka'as halakon nia importánsia".

"Hanesan simeira ida hosi tinan 20, ne'ebé sei adopta Vizaun Estratéjiku foun hosi CPLP no sei hili sekretáriu-ezekutivu foun ida. Iha importánsia maka'as ida. No sei avalia mós situasaun iha ita nia nasaun sira. Xefe Estadu sira sei iha oportunidade hodi troka hanoin sira kona-bá saida maka akontese iha ita nia nasaun sira no oinsá maka artikula hodi hetan solusaun sira ba dame no estabilidade iha nasaun sira ho problema sira, hanesan Brazil, Guiné-Bissau no Mosambike", nia hatutan.

Bainhira hatán ba Lusa kona-bá karik sei aseita mantén iha knaar sira bainhira simeira adia ofisialmente, Murargy hatudu disponibilidade, tanba labele foti inisiativu hodi "husik ró" hafoin simu tiha apoiu hosi xefe sira Estadu nian.

"Ha'u tenki hein atu sira hili ema sira hodi troka ha'u. Loos duni tanba atrapalla oituan (ha'u nia moris). Ha'u iha tiha ona planu sira, karik tenki sai nune'e entaun ha'u tenki halo saida? Ha'u hanesan servidór hosi ami nia Estadu-membru sira. Ha'u tenki aguenta to'o sira desidi hasoru malu hodi hili susesór", nia hakotu.

SAPO TL ho Lusa