El Nino Fo Impaktu Ba Produsaun Batar

Vise Ministru Agrikultura e Peskas, Marcus da Cruz, hateten tinan ida ne’e povu barak mak menus aihan iha sira nia familia, tanba problema bailoron naruk (El nino) ne’ebe fo impaktu bo’ot ba iha produsaun alimentar, liu –liu batar.

Povu barak sei menus aihan (batar) iha tinan ida ne’e (2016), tanba tuir nia, maioria populasaun Timor –Leste konsumu batar, enkuantu produsaun batar tinan ne’e laiha. 

Dadus ida ne’e bazeia ba peskiza nasional ne’ebe Ministerio Agrikultura e Peskas (MAP) hamutuk ho parseiru dezenvolvimentu sira halo foin lalais ne’e iha 402 sukus iha munisipios. 

“Iha parte balun batar moris, maibe isin laiha no balun mate, tan ne’e ita sei infrenta problemas,” Vise da Cruz hateten, iha Hotel Novo Turismo, Dili. 

Nia hatutan, MAP prepara ona fini batar ba agrikultores ne’ebe presiza, tanba agora dadaun udan komesa monu rai fali ona.  

“Ami preparadu atu apoiu fini ba agrikultor sira,” nia dehan. 

Alende ne’e, nia dehan, MAP servisu hamutuk ho Ministeriu Solidariedade Sosial (MSS) hodi responde ba nesesidades populasoens, liu-liu sira ne’ebe afetadu husi El Nino.

Iha Parte seluk, Estensionista munisipio Viqueque, Feliciano Soares, rekonese katak iha tinan 2016 ne’e Viqueque produsaun batar menus kompara ho tinan kotuk (2015).

 “Tinan –tinan to’os hektar ida bele koileta batar tonelada ida ka rua, maibe tinan ida ne’e laiha, tanba batar barak mak mate no la konsege koileta,” nia hateten. 

Nia hatutan, tinan ida ne’e populasaun liu –liu munisipio Viqueque presiza apoiu aihan husi governu, tanba sira laiha produsaun. 

Entretantu agrikultor Francisco Guterres, hateten tinan ne’e (2016) sira la konsege koileta batar, tanba batar isin laiha no balun mate. 

“Ami kuda duni batar, maibe batar ne’ebe ami kuda isin laiha, tinan ne’e ami lahan batar no ami mos laiha fini foun,” nia hateten.

The Dili Weekly