LERE: F-FDTL HO PNTL MAK LUTU NASAUN NIAN

Xefi Estadu Maior das Forsas Armadas Falintil Forsa Defeza Timor Leste (F-FDTL), Maijor Jeneral Lere Anan Timor rekoñese katak, to’o oras ne’e dada’uk membru Polisia Nasionál Timor Leste (PNTL) ho membru F-FDTL sei buka provoka malu nafatin.

Lere Anan Timur dehan, iha sorumutu ho Prezidenti Repúblika (PR), Taur Matan Ruak ne’e, sira ko’alia kona-ba relasaun instituisaun F-FDTL ho PNTL.

“Elementus balun buka provoka malu, no Prezidenti Repúblika ninia lia menon, tenki tau matan ba instituisaun rua ne’e. I instituisaun rua ne’e, tenke sai ida de’it, tanba sira mesak lutu ba nasaun,”  afirma Lere Anan Timur ba jornalista sira iha Palácio Prezidensia Repúblika Aitarak Laran Dili, Kuarta (22/06).

Lere dehan, situasaun ne’ebé mak akontese iha loron hirak liu ba ne’e, dalaruma membru PNTL sira la kompriende saida mak sira halo ona.

“Sira lahatene katak, sira nia atetude ne’ebé mak sira halo, monu ba krime, i sira baku dalabarak ona, i kazu ida ami lori ona ba tribunal, se tesi todan husi ne’ebé no kaman husi ne’ebé,” katak Jeneral F-FDTL ne’e.

Lere dehan, la’os membru PNTL ho F-FDTL de’it mak baku malu ne’e krime, maibé kualker membru PNTL ka F-FDTL baku komunidade ida, ida ne’e krime bo’ot.

Lere afirma, kuandu militar ida komete indisiplinar ruma, ka latuir régra tranzitu ninian, Polisia Militar mak sei kaer nian, polisia labele naran baku.

“Kuandu ita baku ona ne’e, populasaun mós ita saruntu arbiru de’it, ida ne’e depois ita lakon fiar, lakon konfiansa husi ita nia populasaun,” Lere Anan Timur esklarese.

Tanba ne’e, Lere husu ba PNTL atu respeita komunidade, no respeita malu, labele uza violensia iha servisu lor-loron nian, tanba TL iha lei no métodu atu eduka no kastigu ema ne’ebé la’o sala.

Alénde ne’e, Lere Anan Timur mós informa katak, iha sorumutu ho PR Taur Matan Ruak ne’e, nia informa kona-ba dezenvolvimentu iha instituisaun F-FDTL nia laran.

“Kada Kuarta ami mai hasoru Prezidenti, kuandu nia (PR Taur) laiha programa ruma, atu informa kona-ba situasaun, no asuntu sira seluk ne’ebé iha interese ba ita nia Estadu no ita nia nasaun,” informa Lere.

Nia hatutan, iha sorumutu ne’e, sira ko’alia kona-ba ezersísiu roo mersiu iha Timor Leste foin lalais ne’e, no atividades saida mak forsa Americano no Nova Zelandia sira halo.cos

Jornal Nacional