Tensaun Sei La Mosu Iha Elisaun 2017, Horta: “Agora Hau Seidauk Mehi Kandidata Aan Ba Prezidente”

DILI - Eis Prezidente Republika Jose Ramos Horta husu ba lider nasional inklui lider partidu politiku sira, hahu agora buka hadia problema, para too 2017 elisaun lao ho normal, la bele mosu tensaun, nune mos eis Prezidente nee mos hateten nia agora seidauk mehi atu kandidata aan ba Prezidente Republika.

Lia hirak nee hatoo husi Eis Prezidente Horta, ba Jornalista sira, hafoin remata enkontru ho Prezidente Republika Taur Matan Ruak, iha Palasiu Prezidensial, Aitarak Laran, Dili, Kinta (23/06/2016).

Hau husu hahu agora sira buka hadia no halo diak, para elisaun 2017 lao ho normal, la iha elisaun ida iha mundu nee lao ho tensaun, maibe ita hotu-hotu kontribui koalia ho Amu Bispu, liu-liu ba Igreja bele fo kontribuisaun elisaun bele lao diak, tamba elisaun 2017 nee importante tebes. Para bele haklean konselidia demokrasia lao iha TL,” hateten Horta.

Horta mos hatutan nia pasiar ba Letefoho, Amu Domingos Maubere maka konvida nia kleur ona, maibe ba too iha neeba nia hakfodak oituan, nia hanoin vizita nee hanesan simples ida, maibe ema lubuk ida iha neebe ho lia nain sira simu nia hanesan fali simu Prezidente Republika.

Iha parte seluk Xefi Estadu Maior Jeneral F-FDTL Maijor Jeneral Lere Anan Timur hateten papel siguransa ba elisaun 2017, nee servisu Polisia, maibe sira iha akordu ida no iha kordenasaun servisu hamutuk atu asegura estabelidade nasional ida nee. Informasaun kompletu iha STL Jornal no STL Web, edisaun Sesta (24/6/2016). Joao Anibal

Suara Timor Lorosae