Mobilidade no globalizasaun iha CPLP ho Makau nian maka sei sai hanesan tema ba sorumutu hosi universidade sira iha Dili

Mobilidade akadémika no globalizasaun iha espasu CPLP no Makau maka sai nu’udar tema sentrál hosi 26.ª reuniaun Associação das Universidades de Língua Portuguesa (AULP) nian ne’ebé sei hala’o semana oin iha Dili. 

Asosiasaun ne’ebé integra instituisaun 150 hosi ensinu superiór no investigasaun nasaun luzófona no Makau nian, hahú 29-to’o 1-jullu, sei halibur espesialista hosi nasaun oioin, hodi analiza tema barak kona-ba mundu akadémika.

Polítika no estratéjia viabilizasaun hosi mobilidade akadémika iha nasaun luzófona, difuzaun ba lian portugés no dezenvolvimentu hosi siénsia nomós dezafiu Instituisaun ensinu superiór AULP maka sei sai hanesan tema balun ba debate.

Iha enkontru ne’e, sei analiza mos “rota signu: sentidu, migrasaun no interkulturalidade” no “paizajen, natureza ho kultura”.

Iha ninia konvokatória ba enkontru Universidade Nasionál Timor Lorosa’e, ne’ebé hanesan uma-na’in, haktuir hikas katak “mobilidade akadémika hanesan konsekuénsia hosi globalizasaun, difuzaun koñesimentu no produsaun sientífika, nomós nu’udar eixu proritáriu ba enunsiasaun polítika CPLP”.

Iha propózitu ne’e, kontinua iha dezafiu importante atu nune’e “estudante sira bele halo kréditu ho forma integrada ba sira-ninia aprendizajen iha nasaun luzófona hothotu, no dosente ho investigadór sira mos bele haree besik liu tan sira-ninia serbisu koperasaun”.

SAPO TL ho Lusa