Mehi Hasai Doutoramentu Sai Realidade

LISBOA (05/07/16) - Nia kuandu ko´alia, lian bokar kroat, ibun nakdedar no oin mean. Maibé, la signifika nia hirus. Nia simpátiku (bersahabat) ho ema hotu-hotu. Ne´e ninia karater nanis. Nia la´os oin foun ba timoroan. La seluk la leet, nia maka Dr. Valentim Ximenes.

Tanba de´it edukasaun, nia hakur tasi luan no hakat liu rai-rai. Oras ne´e, nia hakmatek iha diáspora ne´ebá (Portugal) hodi kapasita ninia án. Iha rai badin, maske ho risku maibé nia barani hola risku. Risku, la´os risku leet maibé di’ak ba família no mós ba nasaun.

Hanesan batar be hahú isin, Valentim hahoris tiha ona ninia rezultadu estudu. Tinan 2008-2016 iha Portugal, nia konsege atinji ninia mehi. Mehi hasai doutoramentu sai realidade ona iha 30 Juñu 2016 no sura de´it loron atu nia hulan ba rai Lorosa´e (Timor).

Valentim benefisiadu (beruntung) liu-tan no halo netik rai nia naran iha nia istória akadémika iha Portugal. Hafoin tinan atus lima (sékulu lima) kontaktu entre Portugal no Timor-Leste, nia nu’udar timoroan ida ne’ebé maka hasai uluk kursu Doutoramentu iha Universidade de Coimbra iha área Teritóriu, Risku no Polítika Públika.

“Saida maka halo ha’u sente susesu boot liu iha ha´u nia istória akadémika katak hafoin tinan atus lima (sékulu lima) kontaktu entre Portugal no Timor-Leste, ha’u nu’udar timoroan ida ne’ebé maka hasai uluk kursu Doutoramentu iha Universidade de Coimbra. Portantu, ha’u nia naran no ha’u nia kursu hela metin ona iha Universidade Coimbra ninia rejistu. Ida ne’e maka ha’u nia orgullu boot liu buat hotu-hotu,” nia haktuir ba Matadalan iha Portugal, Sesta (01/06/16).

Maske orgullu maibé Fatumaca oan atravesa difikuldade boot ida. Ba timoroan ne’ebé eskola iha nasaun sira ho lian Portugés, partikularmente Portugal, nia dehan, obstákulu boot liu maka “Lian Portugés”.

“Timoroan sira, iha ha’u nia jerasaun ka ita hotu nia jerasaun, ne’ebé boot iha tempu okupasaun Indonézia durante tinan 24 nia laran, laiha baze Portugés konsolidadu, tanba rejime Indonéziu bandu timoroan sira labele ko’alia lian ida ne’e,” nia tenik.

Grasas a deus, bainhira TL restaura tiha nia independénsia, maka iha tinan 2008, nia tuir kursu portugés administradu hosi Instituto de Camões iha Universidade Nasionál Timor Lorosa’e (UNTL) atu bele koñese oituan regra ko’alia no hakerek iha lian ida ne’e iha forma ida sufisiente.

Teoria de´it la to´o atu ko´alia maibé tenki prática lor-loron. Nia hatoman án ko’alia ho malae rai na´in no belun sira hosi nasaun ko’alia lian portugés (CPLP) hanesan Angola, Guiné-Bissau, São Tome e Príncipe, Cabo Verde no Brasil. Portantu, ho esforsu boot, iha posibilidade atu kompriende lalais portugés  no ohin loron nia bele ko’alia di’ak iha lian ida ne’e maski seidauk perfeitu.

“Bainhira ha’u to’o iha Universidade de Coimbra, ha’u halo esforsu maka’as atu hasa’e ha´u nia kapasidade iha lian portugés atu fasilita ha’u nia formasaun. Iha buat tolu maka ha’u tenke halo: Primeiru, ha’u tenke ativu iha aula atu simu lisaun no diskute malu ho Profesór sira no kolega turma sira iha portugés. Segundu, ha’u obrigadu atu tuir kursu portugés hodi hatene loloos regra hakerek no ko’alia tuir padraun matadalan portugés. Tolu, tenke lee notísia iha jornál no haree televizaun inkluindu rona rádiu atu hasa’e no hadi’a maneira ko’alia no rona ho di’ak iha lian ida ne’e,” nia hatutan.

Sé maka finansia? Nia hatán, eskola iha Portugal, ka rai seluk mak la hetan bolsa estudu (beasiswa), ne’e susar atu halo hotu estudu. Tau iha konsiderasaun katak moris iha europa ka amérika ka nasaun seluk  ninia folin boot tebes. Presiza osan boot atu selu eskola, alojamentu, transporte no buat sel-seluk tán.

“Portantu, iha ha’u nia kazu, ha’u nu’udar estudante bolseiru. Durante tinan haat nia laran, Governu Portugés maka selu ha´u nia estudu. Depois, iha tinan ida ho balu nia laran, ha’u nia bolsa muda fali bá konta Governu Timor-Leste nian. Ha’u aproveita hato’o ha’u nia agradesimentu boot ba Governu Timor-Leste ninia tulun no ohin ha’u bele konklui ha´u nia estudu ho rezultadu di’ak,” dehan dosente Universitas Timor-Timur (UNTIM) iha tempu rezisténsia ne´e.

Nia senti ksolok ho rezultadu ne´ebé nia atinji. Tanba ne´e, bainhira fila bá Timor-Leste, nia sei reativa nia funsaun  nu’udar Profesór UNTL nian atu fó formasaun ba estudante sira ne’ebé presiza nia matenek balun.

“Formasaun ne’ebé ha’u simu iha Universidade de Coimbra, Lisboa no Aveiro, ha’u sei koko atu introdús iha UNTL atu tulun hasa’e estudante sira nia kapasidade akadémika hodi bele kontribui ba ita nia rai ninia dezenvolvimentu, kontribui ba dezenvolvimentu família no ba sira nia-án rasik nu’udar sidadaun responsável. Ida ne’e maka ha’u nia misaun atu halo bainhira ha’u to’ofali iha ita nia rain,“ Ximenes informa.

Ba akademista timoroan sira, nia tatoli hela liamenon motivasaun. Atu homan Timor sai nasaun dezenvolvidu, tuir Valentim, timoroan sira tenke estuda maka’as. Tenke lee livru barak. Karik livru laiha entaun aproveita internet atu asesu ba artigu sientífiku sira ne’ebé relevante ho kursu ne’ebé sira estuda. Tenke disiplina-án, komporta ho didi´ak, badinas ba eskola no respeita regra akadémika ne’ebe universidade hatuur.

Aleinde tuir kursu iha fakuldade, nia hateten, presiza envolve-án iha formasaun lian portugés no inglés atu bele hasa’e kompeténsia akadémika hodi bele kontribui pozitivamente ba konstrusaun nasaun iha ida-idak ninia hela-fatin no profisaun rasik. Grande parabéns Dr. Valentim Ximenes.(X2/kontributór)

Biografia

 1.      Nu’udar profesór universitáriu iha UNTL. Hahú hanorin iha tinan 1992, iha Universitas Timor-Timur, iha tempu okupasaun Indonézia.

2.       Hosi tinan 1997 to’o 2000, hasai kursu mestradu iha Ateneo the Manila University, Philippines.

3.      Entre tinan 2002 no 2005 hanesan Dekanu Fakuldade Siénsia Sosiál no Polítika, UNTL.

4.      Hosi tinan 2005 to’o 2007 nomeadu ba Vise-Ministru Administrasaun Estatal iha I-III Governu Konstitusional.

5.       Ba eskola iha Universidade de Coimbra, iha 2008 no ramata iha 2016. 

Matadalan