Xanana: Ne’e Ami Nia Kulpa

Membru Parlamentu Nasional Fernanda Lay, lamentavel ho komunidades ne’ebe kontinua halo uma iha rai protezido sira mesmu governu proivido tiha.

Nia hateten, iha IV governu konstitusional konsege identifika ona area protezida ne’ebe bandu atu ema labele halo uma iha ne’eba hodi hela. 

“Hau haree iha area Tasi tolu no iha area branca ema kontinua halo uma iha ne’eba, ne’e governu tenke superviziona,” Deputada Lay rekomenda.

Tanba, nia dehan sekuandu governu la seriu bandu komunidade sira ne’e, maka iha future estadu sei hasai osan barak ba ida ne’e.

“Kria fali kustu iha future bo’ot liu tan, tanba atu duni sai deit ema sira hanesan ne’e ladun diak, tenke kria kondisaun, ” nia preokupa.

Nia nota, katak durante ne’e governu fraku tebes iha kontrolu no ladun implementa lei ho maximu.

“Governu duranta ne’e seidauk hatudu nia seriadade,” nia dehan.

Hatan ba kestaun ne’e Ministru Planeamentu e Estrategiku Investimentu, Kay Rala Xanana Gusmao, rekonese katak situasaun ne’e akontese tanba governu nia kulpa.

“Hau tenke konkorda ne’e ami nia kulpa,” Ministru Gusmao hateten.

Nia dehan, problema bo’ot ne’ebe governu halo mak ladun kria koordenasaun diak ho xefe suku sira oinsa mak bele proteze rai hirak sira ne’e ho diak.

“Ida ne’e mak ami la kontrolu” nia rekonese.

Maibe, nia promote atu rezolve kestaun ne’e, tanba ikus mai estadu lakohi atu hasai kustu barak ba asuntu ne’e.

The Dili Weekly