Forum Povu ASEAN, Oportunidade Diak Timor-Leste Halo Advokasia Ho Sosiadede Sivil Sudeste Aziatíku Ba Fronteira Marítima

Radio Liberdade Online - Forum Povu ASEAN, oportunidade diak ba Timor-Leste hodi halo advokasia ho Sosiadede Sivil sira iha Sudeste Aziatíku hodi kolia konaba problema Fronteira Maritima, dehan Porta Voz Forum Povu ASEAN, Fernando Ato Costa, ba Jornalista sira liu husi konfrensia da Imprensa iha Edifisiu Fongtil, Caicoli, Dili, 27/6/2016.

“Iha momentu ida ne’e mos oportunidade tebes ba ita tamba ita Luta ba Fronteira Maritima entaun Sosiadade Sivil iha Timor-Leste hanoin katak Forum ida ne’e, oportunidade ida ne’e, oportunidade ba ita atu halo advokasia ho ita nia kolega sira iha sosiadade sivil, iha Sudeste Aziatiku hodi kolia konaba ita nia problema, tamba sira mos iha problema kuaze hanesan Laut Cinha Selatan, liu-liu Nasaun sira hanesan Filipina, Tailandia , ita iha kuaze semilidaridade ba problema Fronteira Maritima ,” dehan Portavoz.

Ato Costa afirma liu tan katak liu husi Forum ida ne’e Timor-Leste hakarak dudu lais liu tan hodi adere lalais Timor-Leste ba ASEAN, “Sosiadade Sivil ita hanoin katak prosesu adezaun ba Asean, Timor-Leste tama Asean ne’e prosesu ida sei lao hela liu husi Forum ida ne’e, ita hakarak dudu halo lais liu tan Asean, atu tau konsederasaun laos ita mak husu deit maibe ita hamutuk ho kolega Sosiadade Sivil sira Asean, atu husu sira atu halo lais liu tan ita nia adeazaun ba Asean tamba razaun sira ne’e mak ita halo Forum iha Timor.”

Konfrensia Sosiadade Sivil ASEAN nian ka ASEAN Peoples' Forum sei hala’o iha Dili, Timor-Leste, husi 2 Agustu to’o 5 Agustu 2016, ho nia Tema “Habelar Ema Nia Solidaridade Ba Komunidade ASEAN Ida Ne’ebe Justu No Inkluzivu“, Forum ne’e sei partisipa husi kuaza 800 liu partisipante, partisipante husi nasaun sira membru ASEAN nian mak kuaze 400 liu no partisipante Nasionál nian besik 300.

Rádio Liberdade, Dili