ALIN LAEK: TENKI KRIA LEI ESPESIAL BA VETERANUS

Eis Gerilleriu Frente Armada Libertasaun Nasional Timor-Leste (FALINTIL) atual Komisáriu Komisaun Homenajen (KH), Custódio Belo “Alin La’ek” ejiji ba órgaun soberanu sira Timor-Leste (TL) tenki kria lei espesial ida, ne’ebé bele asegura direitu, liberdade no seguransa veteranus sira nian, atu nune’e ema ida labele tula liman ba veteranus.

“Relasiona ho akontesimentu oknum Polisia Nasional Timor Lorosa’e (PNTL) no FALINTIL Forsa Defeza Timor-Leste (F-FDTL) balun ne’ebé aserku rezidénsia eis Komandante Gerilleriu rejiaun III, veteranu Cornelio Gama “L-7” iha suku Fatuhada, hanesan veteranus ha’u husu ba órgaun soberanu sira loloos ne’e tenki tau lei espesial ida mai ami veteranus sira, para ema labele tau liman ba ami,” deklara Alin Laek ba JN-Diário iha ninia knaar fatin (25/08/2016), Caicoli Díli.

Alin Laek dehan, veteranus ne’e laiha lei espesial ida ne’ebé atu asegura sira nia moris, wainhira sira reforma entaun ema hotu sei la respeita ona veteranu sira.

“Ami veteranus sira ne’e lei la asegura ami, tanba depois de ami simu reforma ami sente oan kiak total, nune’e sé iha liur maka ema tau liman ba ami veteranus sira, ami atu kesar tan ba sé, ne’ebé ami ne’e hanesan ai-tahan ida kuandu uluk ami sei matak belit ba iha ai-huun, maibé tanba ai-tahan tasak ona tenki monu ona ba rai, nune’e laiha oportunidade atu fila-fali ba huun,” nia dehan.

Nia esplika, nu’udar veteranus konsidera katak veteranu sira ne’ebé uluk luta to’o tinan 24 ne’e sente inseguru, tanba oknum F-FDTL no PNTL maka aserku fali eis FALINTIL ida ninia rezidénsia.

“Tanba iha 20 de Agostu 1975 ita nia gerilleiru sira liu husi Frente Armada Libertasaun Nasional Timor-Leste (FALINTIL) hotu-hotu rezisti hodi kaer kilat hodi luta ba Timor ninia independénsia, maibé iha loron espesial ida ne’e oknum F-FDTL no PNTL balun aserku fali rezidénsia eis gerilleiru “L-7” ninian,” Prezidenti Komisaun Homenajen ne’e fundamenta.

Alin Laek mós husu ba instituisaun rua tenki hasai membru sira ne’ebé mak involve iha kazu aserku rezidénsia L-7 nian. Tanba dehan Alin Laek, tuir loloos kazu ne’e tenki dependente orden komandu ninia, maibé pelo kontrariu, tuir informasaun ne’ebé maka iha katak komandu F-FDTL no PNTL laiha koñesementu ba asaun aserku ne’e.

Nune’e tenik Alin Laek, ema ida ne’ebé maka toma inisiativa individual ne’e la merese atu tama ba instituisaun Estadu ninian.

“Tanba ema ne’ebé hili ona dalan ba parte seguransa ninian hanesan PNTL no F-FDTL nia iha obrigasaun atu defende povu no nasaun, nune’e agora sira maka ataka fali ne’e tenki responsabiliza ba asaun ne’e, nune’e sira nia moral no orden seguransa ninian ne’e iha ne’ebé maka sira tama armadu hodi aserka ema nia rezidénsia arbiru hanesan ne’e,” tenik Alin La’ek.

Komisáriu Komisaun Homenajen ne’e fundamenta katak, Ministériu Defeza (MD) tenki foti desizaun hasai kedas ema sira ne’e iha instituisaun PNTL no F-FDTL, tanba aserka ema nia rezidénsia laiha orden, nune’e sé komandu no karik sé-sé de’it maka haruka oknum sira ne’e tenki hatuun medidas administrativa ba ema ne’e, hodi tau fali ema seluk.ves

Jornal Nacional