Prezidente da Repúblika Kondekora Don Carlos Filipe Ximenes Belo

Prezidente da Repúblika (PR), Taur Matan Ruak entrega prémiu Grande Colar “Ordem de Timor-Leste” nu’udar kondekorasaun aas liu hotu nasaun ne’e nian ba Amu-Bispu Don Carlos Filipe Ximenes Belo.

Taur Matan Ruak iha nia diskursu hateten Don Carlos hanesan ezemplu ida kona-ba espíritu Dedikasaun Tomak, Sakrifísiu no Valór hodi serbisu maka’as lapara atu garante povu timoroan nia direitu ba autodeterminasaun no hanesan defensór boot ida ba Direitus Umanus durante luta libertasaun nasionál.

“Don Ximenes Belo nunka lakon nia aten-barani, mezmu iha momentu susar liu iha ita-nia Istória. Nia nunka baruk atu fó sai ba mundu tomak kona-ba hahalok violénsia ne’ebé akontese iha Timor-Leste, hodi halo apelu ba liberdade Nasaun ida-ne’e nian no ba pás ba ita-nia Povu,” Taur hato’o kestaun ne’e iha nia diskursu, iha palasiu prezidente Nicolau Lobato, Aitarak laran, Díli, Sesta-Feira (26/08/2016).

Eis Guerilleiru ne’e dehan ho sakrifísiu Don Carlos nian hodi fó sai situasaun difísil ne’ebé timoroan sira hasoru ba mundu internasional maka to’o ikus justísa manan iha Timor-Leste nia luta.

Hodi povu Timor-Leste tomak, Taur Matan Ruak entrega Colar “Ordem de Timor-Leste” hodi kondekora Don Carlos hanesan aktus ne’e agradesementu povu Timor nian ba dedikasaun relijioju (Don Carlos).

Iha fatin hanesan Don Carlos Filipe Ximenes Belo hato’o agradese ba Prezidente Repúblika tanba bele oferese ona Medalla Grande Colar Timor-Leste.

“Ha’u agradese ba Sr. Prezidente ne’ebé ho laran luak haraik ona prémiu ida ne’e mai atan ha’u atu simu. Hau simu Medalla nee hodi povu nia naran hanesan wainhira hau simu Nobel da Paz. Tamba, Povu maka luta, povu maka sofre no povu maka mate,” Don Carlos hato’o liafuan ne’e bainhira hato’o diskursu iha seremonia entrega Prémiu iha Palásiu Prezidente Nicolau Lobato, Aitarak Laran, Díli.

Amu-Bispu Don Carlos Nia ezemplu bele sai nu’udar fonte inspirasaun ba jerasaun oinmai kona-ba oinsá atu dedika ita-nia moris ba ema kiak sira, ba ema kbiit-laek sira no mós ba ema iha terus laran.(Efrem)

Matadalan