Prezidenti Repúblika Promulga Ona OJE Retifikativu 2016

DILI, (ANTIL) – Prezidenti Repúblika, Taur Matan Ruak, Segunda, (8/8) promulga ona Orsamentu Jerál Estadu (OJE) retifikativu ba tinan 2016 ho montante dollar Amerikanu milliaun 391, maske nia sei dúvida kona-ba opsaun hirak ne’ebé hetan fatin iha OJE.

“investimentu daudaun nian labele sakrifika dezenvolvimentu aban-bainrua nian, liu-liu haree ba montante dotasaun orsamentál ne’ebé maka mobiliza tiha ona ba tinan ida-ne’e no mós ba osan ne’ebé transfere hosi Fundu Petrolíferu ne’ebé a’as liu duké Rendimentu Sustentável Estimadu (RSE), inklui mós prioridade sira-ne’ebé maka define iha OJE”, Taur Matan Ruak hatete iha ninia mensajen.

Tuir komunikadu imprensa hosi Gabinete Prezidenti Repúblika ne’ebé ANTIL simu iha Segunda, (8/8) lokraik hatutan, maske Prezidenti dúvida kona-ba opsaun importante liu ne’ebé temi iha OJE retifikativu ba tinan 2016, Prezidenti Repúblika promulga ona Dekretu Parlamentu Nasionál nú. 29/III, Alterasaun Dahuluk ba Lei nú. 1/2016 hosi loron 14 fulan-Janeiru, ne’ebé maka aprova OJE nian ba 2016, hodi la atraza tan ezekusaun orsamentál ba 2016, liu-liu tanba OJE retifikativu hetan ona aprovasaun ho maioria parlamentár.

Mensajen ne’ebé maka haruka ba Parlamentu Nasionál, haktuir Konstituisaun nia art. 86 e), hanesan Prezidenti Repúblika nia “kontribuisaun ba governasaun rekursus ida ne’ebé di’ak liu posivel hodi fó benefísiu ba ita-nia Povu, la’ós de’it iha momentu aprova OJE retifikativu ba 2016, maibé mós iha momentu ne’ebé ita prepara hela OJE ba 2017”. (jornalista: Xisto Freitas; editora: Rita Almeida)