Timor-Leste Sei Uza “Single Window” ba Komersiu

DILI, (ANTIL) – Governu Timor-Leste liuhosi Komisaun Reforma Fiskál planea ona atu aplika “single window” ba atividade komérsiu.

“Tempu to’o ona atu ita intensivika servisu ho ministérius hotu-hotu iha área komérsiu no presiza servisu hamutuk atu fasilita komérsiu iha rai laran”, Koordenadór Komisaun Reforma Fiskál, Fernanda Borges iha Sorumutuk Estrutura Ekonómiku Governu iha salaun TradeInvest, Kinta (8/9/).

Fernanda informa oinsá atu aumenta reseitas ba estadu no dezenvolvimentu ekonómiku liu-husi alfandegas hanesan nia plataforma no fó asesu merkadu ba ita nia emprezárius rai laran no rai seluk atu involve iha kresimentu ekonómia.

Nia esplika, atu automiza prosesu hotu-hotu kona ba komérsiu liu-husi transforma IT governu mos sosa ona sistema ASYCUDA (Automated System for Costume Data) hanesan sistema jestór ba dadus taxa ninian ne’ebé foka liu-ba prosedimentus komérsiu estranjeiru.

“Sistema ne’e atu regula manifestus no deklarasaun aduaneiras, prosedimentu kontabilístikus, trânsitu no prosedimentu suspense nian. ASYCUDA jeneraliza dadus komérsiu ne’ebé bele uza ba análiza ekonómika estatístika”, nia hateten.

Tuir nia, Timor-Leste persiza moderniza sistema alfandegas no rekruta tan ema ne’ebé iha kompetensia iha áreas spesifikas atu nune’e bele hadi’a ita nia sistema alfandegas tuir standar internasionál no bele aumenta reseitas ba estadu. (jornalista: Julia Chatarina; editor: Gantry Meilana)

Foto: Fernanda Borges. Foto espesial