Nasaun Membru Sudeste Aziatiku Promete Luta Kontra Moras La hada’et

Enkontru Komite Regional Sudeste Aziatiku ba dala 69, iha Sri Lanka, nasaun membru sira hanesan Bangladesh, Bhutan, Democratic People’s Republic of Korea, India, Indonesia, Maldives, Myanmar, Nepal, Sri Lanka, Thailand no Timor-Leste, deklara komitmentu governu nian atu luta kontra moras la hada’et iha regiaun.

Iha enkontru ne’e, Diretora Regional Sudeste Aziatiku, Dr. Poonam Khetrapal Singh hateten nasaun membru sira adopta deklarasaun Colombo ne’ebe sei haforsa asistensia ba moras la hada’et hahu husi saude primaria liu –liu prevensaun, akonselhamentu, detensaun sedu no tratamentu.

Nia hateten, moras la hada’et afeta ba nasaun hotu iha mundu, e entaun nasaun regiaun sudeste aziatiku deside hodi fo atensaun espesifiku liu tan ba moras la hada’et, tanba kuaze ema nain 8.5 miliaun mak mate kada tinan, tanba sofre moras lahadaet (diabetes, kankru, atakasan fuan, struk no seluk tan).

“Ohin loron ema barak mak mate kauza husi moras la hada’et no hadaet,” nia hateten iha comferensia imprensa Inagurasaun 69th session of the WHO Regional Committee, iha Nelum Pokuna Theartre, Colombo.

Nia rekonese, katak alkohol, sigaru no dieta la saudavel nafatin sai dezafiu bo’ot ba iha nasaun membru sira atu elemina moras la hada’et.

Maibe, nia dehan iha asaun importante hat mak nasaun membru sira presiza halo, mak halo kontrolu ba alkohol, kontrolu tabaco, halo dieta saudavel inklui mos promove ezersisio fiziku.

Alende ne’e moras la hada’et, nasaun membru sira mos diskute kona ba Sustainable Development Goals (SDGs) no problema antimicrobial resistance (AMR), eleminasaun moras Neglected Tropical Diseases (lepra, yaws, filariasis, kala azar, schistesomiasis), dezastre naturais (emergency reform), saude inan no oan no rekursus humanus.

Iha parte seluk, Minister of Health Nutrition and Indigenous Medicine Sri Lanka, Rajitha Senarathne hateten sira iha progresu signifikante tebes ba iha eleminasaun moras hada’et sira, maibe moras la hada’et nafatin sai dezafius ne’ebe nasaun ne’e hasoru. 

Nia hateten, kada tinan sira hetan rendementu biliaun atus ba atus husi taxa tabaco no alkohol nian, maibe sira nia governu mos hasai osan biliaun 72 atu halo tratamentu ba moras sira ne’ebe kauza husi tabaco no alkohol.

Tuir nia, atu redus numeru moras la hada’et iha Sri Lanka, governu sei hasa’e taxa tabaco nian husi 72% ba 90%, nune’e mos taxa ba masin no masin midar. 

Entretantu Vise Ministra Saude Timor-Leste, Ana Isabel de Fatima Sousa, hateten moras la hada’et (cardiovascular, kankru, diabetes no seluk tan) hanesan moras setimu (7) lugar ne’ebe oho ema barak iha Timor-Leste.

Nia dehan, dadus ospitais hatudu katak 22% pasiente mate iha ospital tanba sofre moras cardiovascular no 90% mate iha liur no la registu.

“Ho oportunidade ida ne’e, hau hakarak informa ba imi hotu katak ministerio saude no OMS TL dezenvolve ona planu strategiku national ba moras la hada’et ne’ebe haree liu ba haforsa sistema detensaun sedu no managementu ba moras la hada’et,” Ministra nia intervensaun iha plenaria meja redonda.

"Sai prioridade ida husi prioridade hat ne’ebe ministerio iha”.

Atu prevene moras sira ne’e, nia dehan ministerio dezenvolve ona programa outreach (vizita domisiliario, mobile clinic, SISCa no saude da escola), ho objetivu atu halo edukasaun no promosaun saude ba komunidade sira no halo detensaun sedu ba moras kronika sira.

Nia informa mos, katak postu saude 225 estabelesido ona iha sukus no sentru saude 66 iha teritorio timor tomak hodi fo atendimentu saude primaria ba komunidade.

The Dili Weekly