segunda-feira, 12 de setembro de 2016

Funu FM Hasoru Australia Sei Naruk, Xanana: “Australia Moe Laiha”


DILI – Funu ou luta Timor Leste konaba Fronteira Maritima (FM) hasoru Australia sei naruk, maibe TL sei la hakiduk nein pasu ida ba kotuk no sei la fo ulun ba Australia atu sama, tanba Australia nasaun ida neebe mak boot maibe laiha moe hodi kontinua supa mina iha Tasi Timor.

Deklarsaun nee fo sai husi negosiador Fronteira Maritima Timor Leste, Kay Rala Xanana Gusmao, liu husi deskursu iha Aeroportu Nicolao Lobato-Comoro, Sabadu (10/009/2016) wainhira fila husi Tribunal Internasional Holanda.

Funu sei naruk ituan tanba ita nia funu maluk Australia laiha liu moe, moe laiha ou rasa malutanba rai boot ona neebe dezenvolvidu kompara ho ita maibe kontinua supa ita mina nee hatudu moe mak laiha,” hatete Xanana Gusmao.

Nia mos hatutan too ohin loron Australia kontinua sura nia kole neebe halo ona Timor Leste wainhira Timor Leste hetan problema hanesan iha tinan 1999 nomos krize 2006, hodi hatete TL nunka agradese ba Australia nia diak maibe tuir Xanana apoiu neebe mai husi Governu Australia laos tan buat seluk maibe iha intrese ba mina iha Tasi Timor.

Xananan haktuir maske Australia kontinua toos no sura kole neebe halo ba TL nee laiha buat ida, maibe povu Timor Leste sei la hakiduk maske mate mohu, tanba uluk luta ba libertasaun maske mesak deit mos TL sei manan, satan iha tempu agora neebe mak lao livre nee povu TL sei la tauk mate hanesan mos iha tempu funu nia laran.

Iha fatin hanesan Prezidente Interinu Asosiasaun dos Combatentes da Brigada Negra (ACBN), Nuno Corvelo Sarmento Laloran liu husi nia karta komonikadu hatete haree ba pozisaun official Australia nian relasiona ho Komisaun Konsiliasaun iha ONU hodi rejolve FM, neebe mak dehan Komisaun laiha poder juridiku ida atu halo audensia ba problema delimitasaun hodi la hakruk ba desizaun neebe mak komisaun hasai, ACBN kondena Australia moe laiha no laran makerek. Informasaun kompletu iha STL Jornal no STL Web, edisaun Tersa (13/9/2016). Thomas Sanches

Suara Timor Lorosae

Sem comentários: