Família Haloot Ona Amu Monteiro

DILI, (ANTIL) – Ministru Interiór, Longuinhos Monteiro nu’udar reprejentante família hatete, agradese ba igreja, sarani Katólika no governu Timor-Leste tanba, sai hanesan família rasik hodi haloot matebian Amu José Nolasco Santimano Menezes e Monteiro.

“Tanba ne’e, atu ko’alia família, igreja, sarani Katólika no governu Timor-Leste sai nia família di’ak hanesan nia família sira ne’ebé iha India”, Longuinhos hatutan iha serimonia funebre mate isin Amu Monteiro iha semiteriu Maloa, Segunda, (3/10).

Padre Paroku Bedois, Alberty Franco Morato hatutan mos, família hosi padre Monteiro la mai tanba, informasaun mak derepente ba, rai mós do’ok, nia maun alin sira, subriñu sira mós idade hotu ona, ne’ebé imposivél sira atu halo viajen do’ok.

Ema ne’ebé hatene matebian ne’e mak nia maun alin sira ne’e maibé, sira mós hela fahe malu tiha hanesan balun iha India, Goa, Kanada no Mocambique.

Entretantu, Amu Angelo Salsinha nu’udar komisaun organizadór hatete, preparasaun ba kee rai kuak hosi grupu juventude Sao Tiago no sarani sira ne’ebé mak dezde horseik to’o ohin loron.

Programa serimónia funebre hetan partisipasaun másimu hosi igreja, sarani Katólika no estadu Timor-Leste iha prosesu mate to’o haloot ikus iha semitériu Maloa iha tuku 13.00.

Iha semitériu, Amu Salsinha hateten, rate ne’e hakohi ona amu nain tolu inklui Amu Monteiro.(jornalista: Zezito Silva; editora: Rita Almeida)

Foto: Prosesu misa iha Igreja Katedral antes serimonia funebre. Foto ANTIL/Antonio Goncalves