Faze ikus hosi resenseamentu ba eleisaun 2017 iha Timor-Leste hahú semana ne’e

Faze ikus hosi prosesu resenseamentu eleitorál ba eleisaun prezidensiál no lejislativa tinan 2017 iha Timor-Leste, hahú ona semana ne’e no prosesu refere sei remata iha fulan janeiru ninia rohan. 

Aranke hosi faze ikus ne’ebé konta ho prosesu rejistu online , sei liga ba munisípiu hothotu, hahú ohin ho rejistu simbóliku hanesan eleitór ministru Administrasaun Estatál, Dionísio Babo.

“Ita iha sistema ida ne’ebé sei fasilita komunikasaun nomós atualizasaun permanente no simultánea hosi baze dadus. Iha kazu espesífika, bele deteta problema hotu nomós ajuda fasilita resenseamentu iha zona balun”, tuir saida maka nia esplika ba Lusa.

“Iha faze resenseamentu ikus ne’ebé sei hala’o to’o 23-dezembru, sei tuir kedas ho prosesu publikasaun rezultadu nomós koerasaun molok halo publikasaun ba iha Jornál Repúblika”, dehan.

Tuir dadus ne’ebé fó sai ohin, haktuir katak to’o finál fulan agostu eleitór hamutuk 728.363 maka rejista ona, no rihun 153 hosi kapitál Dili. Eleitór barak liu maka tinan 17 to’o 35 (rihun 369 ka 51%), tuir maka hosi idade 36 to’o 59 (rihun 118 ka 33%) no bot liu maka ho tinan 60 (rihun 118 ka 16%).

Sei iha mos lista 1.370 hosi eleitór ho idade 16.

“Dadus hirak ne’e hatudu katak, eleitór barak maka foin-sa’e. No ida ne’e sei lori vizaun foun, espetativa foun ba polítika timor-oan nian”, tenik Babo.

“Populasaun joven ne’e, barak maka foin atu tuir vota, sei fó espíritu ba polítiku sira, atu hanoin ba meta foun nomós objetivu, duke hanoin beibeik ba pasadu”, nia dehan tan.

Eleisaun prezidensiál iha Timor-Leste, marka ona ba fulan abril no lejislativa ba fulan juñu tinan 2017.

SAPO TL ho Lusa