TEKNIKU ADN BALUN MOS ‘IMPLEMENTADOR’ PROJETUS

Membru Parlamentu Nasional (PN) husi Komisaun E ba asuntus Infra-estruturas, Transportes no Komunikasoens, Manuel Castro, duvidas ho servisu Agensia Dezenvolvimentu Nasional (ADN) tanba iha tekniku ADN balun mos sai fali ‘implementador’ ba projetus.

“ADN nia kna’ar atu halo berifikasaun, monitorizasaun ba projetos sira, maibe ba implementa fali projeto hodi haluha tiha sira nia kna’ar lolos ne’ebe mak hatur ona iha lei,” hateten deputado Manuel Castro wainhira halo audensia ho Ministeriu Obras Publikas (MOP) ho Ministeriu Planeamentu Investimentu no Estratejiku (MPIE) iha plenaria, Kinta (27/10/2016).

Deputado Manuel Castro fo sasin katak, wainhira sira tun ba halo fiskalizasaun iha terenu haree mos ADN halo projeto bo-boot sira ne’e. Tanba ne’e maka husu katak kuandu ADN mos implementa projetos ne’e, se los mak atu berifika no halo monitorizasaun ba projetos.

Reprezentante povu ne’e mos duvida ADN nia supervizaun ba dezenho no BoQ ba projeto sira, tanba wainhira sira fiskaliza projeto konstrasaun armagem SAMES nian ho volume serbisu ki’ik liu kompara ho projeto edefisiu PDHJ nian, maibe nia orsamentu hanesan deit.

Deputado bankada FRETILIN preokupa ADN no Obras Publikas halo servisu sobre pozisoens hanesan, projeto ponte Bidau Santa Ana, ADN mak halo depois obras publikas halo fali saida.

“Kuandu hanesan ne’e halo tan lei ida atu bele fo kompetensia ba ADN atu nia bele kaer projeto, bele halo fiskalizasaun ba obra, no labele fiskaliza nia an,” lamenta Manuel Castro.

Nia dehan, projeto barak mak kualidade laiha, maibe ADN aprova no halo pagamentu, maibe realidade kleur deit projeton ne’e at fali ona.

Nia fo sasin katak, hanesan estradas sira iha capital Dili, Komisaun E tun ba halo fiskalizasaun hodi haree ba nia espresura kamada aspal mahar iha dezenho hatudu iha ne’eba katak primeiru kamada aspal nia mahar tenke 6 cm, segundu kamada aspal nia mahar 4 cm, maibe iha terenu rezultadu hatudu katak primeiru kamada aspal nian mahar 3 cm, segundu kamada 3,4 cm deit, maibe Governu selu, selu tuir  valor ka osan ne’ebe mak aloka iha BOQ katak, kamada primeiru aspal nia mahar 6 cm, segundu aspal nia mahar 4 cm.

“Ne’e faktus ne’ebe mak ami hetan, ita foin har’i konstrusaun Estado, maibe ami nia hanoin mak ida ne’e ita foin maka hahu ne’ebe tenke hahu ho diak,” afirma Manuel Castro.

Hatan ba preukupasaun ne’e, Ministru Planeamentu Investimentu no Estratejiku (MPIE), Kayrala Xanana Gusmão, hateten katak, ADN mos halo projeto, tanba obras publikas nia serbisu barak liu.

“Aproveita hodi ami ajuda malu ida, obras publika lahare karik ami hare, ida ladun presta atensaun karik ami presta atensaun,” klarifika Xanana Gusmão.

Ministru Obras Publikas Transportes no Komunikasoens (MOPTK), Gastão Sousa, projetu armagem SAMES ki’ik, maibe nia valor osan hanesan ho edefisiu PDHJ, tanba material ne’ebe mak uja ba projeto armagem SAMES nia kualidade diak liu.

Nia hatutan, kona ba ponte Bidau Santa Ana nia dezenho la’os ADN mak halo, maibe impreza ida mak halo, depois KAFI mak aprova no implementa. mia

Jornal Nacional