PM Rui Kongratula Feto Timor-Leste

DÍLI, (ANTIL) - Primeiru-Minstru (PM), Dr.Rui Maria de Araújo kongratula feto Timor-Leste iha ámbitu komemorasaun loron nasionál feto Timor-Leste, Kinta (03/11/16). “Parabéns, Feto Timor-Leste hotu, ba selebrasaun Loron Nasional Feto nian!Ida ba hotu-hotu, Hotu-hotu ba ida!,” kongratula PM.

Xefe Governu VI Konstitusionál hateten, iha loron 3 Novembru 1975 ita nia feto lutadora ba libertasaun nasionál ida naran Maria Tapo, mate iha kampu batalla, iha fronteira Tapo, Maliana, Munisípiu Bobonaro, hasoru forsa invazór sira.

“Maria Tapo mate tanba hakarak povo Timor-Leste atu sai husi nakukun-laran, atu livre husi ki’ak no mukit rabat-rai,” PM Rui hateten.

Hanesan loron importante,  deside tiha ona sai loron feto no tinan-tinan sempre komemora Loron Nasionál Feto iha Timor-Leste.

Tuir Primeiru Ministru, feto iha Timor-Leste hola parte iha frente hotu-hotu, durante luta ba Libertasaun Nasionál. Balu hola parte iha Frente Klandestina, Frente Armada no balun iha rai-liur iha Frente Diplomátika.

Primeiru-Ministru, Rui Maria de Araújo hatutan, Timor-Leste hanesan sosiedade patriarkál ida ne’ebé limita feto nia papél, knaar atu foti desizaun iha uma-laran no iha komunidade nia le’et, sei nafatin barak-liu iha mane sira.

Nune’e mós kestaun ekonómiku-finanseira, iha prátika lorloron sei fó liu fatin ba mane, maske iha realidade feto mak halo servisu lubun-bo’ot ida, hanesan jere uma laran, hili-ai, kuru-bé, serbisu iha to’os ka iha natar.

Entertantu, iha área importante lubun ida, hanesan iha área polítika/governasaun, edukasaun, no empregu/merkadu traballu, feto nia envolvimentu no partisipasaun sei nafatin ki’ik kompara ho mane sira.

Kona-ba violénsia bazea ba jéneru, liu-liu violénsia doméstika, tuir Primeiru Ministru, sei maka’as no akontese iha fatin barak. Feto nafatin sai objetu husi violensia ne’e, hodi impede sira-nia partisipasaun iha dezenvolvimentu nasionál.

Governu Timor-Leste iha komprimisiu bo’ot ba kestaun igualdade jéneru. Liuhusi polítika “Abordajen Integrada Jéneru”, governu buka atu asegura katak nesesidade, esperiénsia, no preokupasaun husi mane no feto sira, sai nu’udar parte integradu iha dezeñu, implementasaun, monitorizasaun no avaliasaun husi programa hothotu. Nune’e feto no mane sira hetan benefísiu hanesan husi prosesu dezenvolvimento iha Timor-Leste.

Iha parte seluk, atu bele kombate dezigualdade,  Governu tau mós atensaun atu hakbiit feto iha área polítika. Feto lori hanoin sira ne’ebé úniku no importante, perspetiva ho koñesementu ne’ebé kritiku ba dezenvolvimentu politika, estratejia no lei sira ne’ebé governa ita-nia nasaun, no determina ita-nia prioridade futuru nian.

Envolvimentu no partisipasaun ativu feto nian bele asegura katak nesesidade 50% husi ita nian populasaun, sei rezolve no rekursu ne’ebé sufisiénte sei aloka atu reszolve nesesidade espesífika feto nian iha rai-laran tomak.

Atu bele atinji objetivu ida ne’e, tuir PM Dr. Rui Maria de Araújo dehan, Governu organiza formasaun oi-oin ba feto sira, hodi prepara sira ba partisipa iha vida polítika iha komunidade nia le’et, liu-liu iha eleisaun suku no aldeia iha teritóriu tomak.

“Hanesan ita hotu hatene, partisipasaun feto Timor-Leste iha nível nasionál boot duni. Maibé, iha nível lokál sei ki’ik-oan hela. Maioria ka 98% husi Xefe Suku no Xefe Aldeia atuál, mesak mane de’it,” PM hateten.

Maske nune’e, PM rekunese, nasuan seluk apresia partisipasaun feto Timor-Leste iha polítika ne’ebé aas, maske iha nível aldeia no suku ita sei presiza halo mudansa barak.

Iha sorin seluk, Governu hala’o mós programa hakbiit feto iha ekonomia, nu’udar dalan ida atu promove igualdade jéneru entre feto no mane sira.

Liu husi prosesu hakbiit ekonomia, eis ministru Saúde ne’e dehan tan, feto sira bele ajuda rezolve nesesidade uma-laran, bele hamenus dependénsia ekonómiku-finanseira husi mane, no bele iha dalan ne’ebé nakloke liu-tan ba sira-nia envolvimentu no partisipasaun iha atividade sosiu-ekonómiku iha nível komunidade lokál no mós iha nível nasionál.

Xefe Governu, Dr. Rui Maria de Araújo husu ba povu tomak, atu hanoin hikas feto-maluk hotu-hotu ne’ebé sei nafatin luta ba justisa, igualdade no progresu iha ita nian nasaun nia laran.

“Ha’u mós husu ba mane hotu-hotu atu nakloke no envolve-aan iha esforsu atu hamenus deziguladade no violénsia ho baze ba jéneru, hahú kedas husi ida-idak ninia uma-laran,” apela PM Rui.

Timor-Leste bele atinji mehi kona-ba sosiedade ida ne’ebé livre husi opresaun no deziguladade jéneru, tuir mehi husi Saudozu Nicolau dos Reis Lobato, Maria Tapo no heroina sira seluk hanesan Rosa Muki Bonaparte, Soimali, Wewe, Maria Gorete, nomós sira seluk tan, bainhira feto hamutuk ho mane iha Timor-Leste servisu hamutuk atu lori mehi ne’e sai realidade. (Jornalista: Rafy Belo/ Editor: Otelio Ote)

Foto: PM Dr. Rui Maria de Araújo/ Foto GPM