SAMALA-RUA: “POVU MAK SAI NA’IN BA ESTADU”

Kandidatu independenti ba Prezidenti Repúblika (PR) periodu 2017-2022, José António de Jesus das Neves “Samala-Rua” hateten, povu mak sai na’in ba Estadu ida ne’e, tanba povu maka soberania país ida ne’e.

Samala-Rua hateten katak, palavra povu mak sai na’in ba Estadu ne’e mós sai ona hanesan ninia lema prinsipál ne’ebé motiva nia hodi kandidata-an nu’udar kandidatu independenti ba PR.

“Ha’u nia kandidatura nu’udar kandidatu independenti, tema ida importante ba ha’u nia lema ba prosesu kandidatura ne’ebé ha’u temi, povu mak sai nain ba Estadu, hamutuk ho ha’u kandidatu independenti ida, José das Neves, Samala-Rua povu mak sai na’in ba Estadu,”dehan José Neves Samala-Rua ba Jornalista sira liu husi konferensia imprensa, iha nia knua Samala-Rua, Rua São Tomé 18, Palapaço Motael-Díli, Segunda (20/02), ne’ebé partisipa mós husi ninia apoiantes balun.

Kandidatu ba Xefi Estadu ho númeru sorteiu hat (4) ne’e esklarese katak, povu mak harii Estadu ida ne’e, no soberania rai ida ne’e no  povu ida ne’e, mak povu ne’e rasik. Poder polítiku ninia hun mak povu, povu mak abut no kbi’it forsa polítika. Estadu no dezenvolvimentu, povu hatudu tiha ona nia kbi’it ne’e iha tempu sira hirak liuba.

“Prosesu libertasaun to’o ita ukun-an, povu mak hakiak Frenti Armada, povu mak hamahan Frenti Klandestina, povu mak fó kbi’it ba Frenti Diplomátiku atu koalia konaba Timor nia problema no destiñu iha mundu internasionál. Povu ida ne’e duni mak halo desizaun final ikus liu konaba libertasaun no indepedénsia ne’ebé halo iha 30 Agostu 1999, povu iha tempu ida ne’e desidi Timor Leste ninia futuru,” Samala-Rua esplika.

Nune’e mós José Neves dehan, agora ba eleisaun jeral tinan 5 dala ida ne’e, povu ne’e mak sei hili fila fali nia oan sira ba kaer kna’ar iha Estadu hodi servi povu, husi sira lubuk ne’e, ida mak Prezidenti Repúblika no husi sira lubuk ida ne’e, ida mak nia rasik ne’ebé agora kandidatu-an atu sai Prezidenti da Repúblika.

Nia fundamenta katak, tuir observasaun Tribunal, husi parte lei no téknika haree katak iha ema na’in 8 mak agora dadaun hamriik husi povu ne’e nia leet hodi hakat ba simu kargu ida Prezidenti da Repúblika, maibé povu mak sei desidi.

“Ami hamriik de’it maibé povu mak tenki desidi, ne’ebé ami lubuk ida sei hamriik koalia ba imi la’o ba hasoru imi, imi haree tiha ona ami no agora haree tan dala ida, imi rona tiha ona agora rona tan dala ida, agora imi hanoin tetu no ikus mai ita hotu hili, ha’u mos hili, hili husi 8 ne’e ida de’it mak ba kaer kna’ar nu’udar Prezidenti da Republika ba Timor Leste,” Samala-Rua afirma.

Ne’eduni nia dehan, povu tenki hili didi’ak, hili ho laran no hakarak rasik, la’os tan sasan ruma mak dada sira hodi ba hili lideransa Nasaun nian.

“Sé sasan ruma mak dada ita mak ita hili, entaun ita hatun-an, hafoer ita nia dignidade nu’udar povu no ita nia kbi’it nu’udar na’in ba Estadu ida ne’e, nune’e mós ita nega assuwain sira ne’ebé mate para ita moris hodi hetan liberdade no ukun-an,”nia fundamenta.

Nune’e nia mós hato’o mensajen ba povu katak, hili nia lideransa sira ho kbi’it rasik, labele hili tamba kbi’it mai husi sasan ruma.

“Sasan ruma halo imi iha kbi’it mak imi hatun-an tiha ona, hatun tiha ona dignidade povu ida be na’in ne’e sai atan fali,” José Neves akresenta.

Nia aprofunda katak, sira hamriik ba kandidatu-an, maibé povu mak desidi, sé povu desidi loloos, sei hetan lider di’ak ida, maibé sé desidi sala mós hetan lider sala. Tamba ne’e povu tenki tetu no hanoin didi’ak hodi hili lideransa Nasaun nian.

“Ita nia maun sira lubuk ida hahú tiha ona, agora ita hatutan, hatutan ho didi’ak, ukun ho didi’ak, valoriza sira, ukun sala, ukun ladi’ak, hatun sira. Ne’eduni tenki kaer didi’ak mensajen ida ne’e, tamba ne’e liafuan badak mak ne’e, povu mak sai na’in ba Estadu ida ne’e, hatudu tiha ona husi tempu uluk to’o agora ba oin no ba nafatin,”dehan José Neves.

Partisipa iha konferensia imprensa ne’e mak hanesan, Vise Sekretáriu Jeral Partidu Timorense Democrático (PTD) ne’ebé mai ho estrutura tomak deklara apoiu ba kandidatura Prezidenti José das Neves, veteranus balun husi Oecusse, simpatizantes no apoiantes balun iha munisípiu 13.ías

Jornal Nacional Diário