João Correia: Kongresu ASDT Ilegál

Kongresu Partidu Asosiasaun Sosial Demokrata Timorense (ASDT) ba periodu 2017-2022 maka sei termina partidu istóriku nia futuru ne’ebé oras ne’e dau-daun iha hela konflitu de lideransa ne’ebé nakfahe ba kubu rua (2).

Liuhosi konferensia da imprensa ne’ebé realiza hosi militantes no koordenadór munisípiu 12 no reziaun espesial Oe-Cussi Partidu ASDT nian nu’udár orgaun independente ida, iha Sekretariadu Nasionál Administrasaun ASDT, Tettre Manu Aman, Beduku, Díli, Sabadu (19/02/2017), reafirma katak militante no simpatizantes ASDT nian sei halo kongresu ida bazeia ba notifikasaun ne’ebé Tribunal Rekursu hato’o hodi bele harmoniza Partidu istóriku ne’e nia futuru.

Bazeia ba estatutu partidu ASDT nian kapitulu hat (4), artigu 16 kona-ba orgaun nasionais, artigu 17 kona-ba kongresu nasionál no artigu 18 kona-ba kompetensias, hatete kongresu nasionál reuni ordináriamente kada tinan lima (5) tanba ne’e militante sira deklara atu realiza kongresu nasionál iha loron 25 Fevereiru 2017.

“Husu ba versaun João Correia ho Francisco da Silva, iha tempu badak buka malu para partisipa iha kongresu nasionál ne’ebé realiza iha loron 25 Fevereiru 2017,” Prezidente komisaun Independente ASDT, Jose Soares Boavida “Dasi Rai” dehan.

Nia esplika durante mandatu tinan lima (5), periodu 2012-2017 líder partidu nunka kumpri sira nia dever no obrigasoens tuir regulamentu iha estatutu partidu ASDT hodi kontrola militantes no hala’o atividades konsolidasaun.

Francisco dehan komisaun organizadora ba kongresu nasionál nu’udár komisaun independente, husu ba delegadu partidu ASDT katak labele tauk no hanoin barak hodi hola parte iha kongresu ne’ebé mai nune’e sai ida de’it hanesan isin no klamar ASDT.

Komisaun idependente ne’e mós husu atu estrutura periodu 2017-2022 atu aprezenta relatóriu serbisu durante mandatu. Aprezenta mós finanseiru ka kontabilidade, patrimóniu no planeamentu kona-ba polítiku partidu ASDT nian iha eleisaun parlamentar tinan 2017.

“Kuandu versaun sira laiha prezensa iha kongresu nasionál maka militante no estrutura ASDT afirmadu katak líder hosi versaun rua indikadu for a ona hosi partidu ASDT maka delegadu sira tenke foti medida urjente para responde líderes de vagansia partidu ASDT iha kongresu nia laran,” Francisco esplika.

Hatan kona-ba kongresu ne’e rasik legal ka lae? Francisco dehan “Kongresu ne’e legal tanba ami fó ona ami nia dokumentu ba Tribunal Rekursu no CNE”. Tribunal haruka kart aba partidu ASDT? Francisco Tavel Soares dehan “Sim, karta ne’e mensiona kata kami tenke hala’o ona konferensia imprensa, depois de ami pas aba kongresu nasionál iha 25 Fevereiru 2017 para ami bele adopta iha eleisaun parlamentar”.

Kongresu nasionál partidu ASDT sei hala’o iha Sekretariadu Nasionál Administrasaun ASDT, Tettre Manu Aman, Beduku, Díli, iha loron 25 Fevereiru 2017 ne’eb’e sei partisipa hosi kada munisípiu delegadu hamutuk 30.

Entretantu Prezidente partidu ASDT, João Correia hatete Tribunál Rekursu hatun desizaun dala tolu (3) ona (5 Abril, 29 Maiu no 7 Novembru 2016) kona-ba lijitimidade estrutura ida ne’ebé maka kaer estrutura partidu ASDT.

João esplika kazu ne’e hahú hosi 2012 iha Aileu primeiru kongresu extra-ordináriu, grupu ne’e duni maka halo ona kudeta ida ba partidu, sira ne’e duni maka halo no konsege di’ak tiha fila-fali.

“Tuir lolos ne’e krimi ona tanba Tribunál Rekursu hatun desizaun dala tolu (3) ona katak ida ne’ebé legál ne’e ha’u ho ho Vicente ne’ebé estrutura 2012 nian. Sé sira haruka tan rurat mai atu konvida ka halo petisaun ne’e laiha ona legalidade,” João dehan.

Nia akresenta karta ikus ne’ebé Tribunal Rekursu haruka ba Partidu ASDT ne’e kona-ba lejitimidade ne’ebé João Correia ho Vicente maka lidera partidu ASDT durante tinan lima (5).

Ita boot kongresu ne’e illegal? João hatan “Ilegál %100, labele, labele. Tribunál Rekursu analiza tiha sira nia kongresu iha 18 de Juñu halo iha CNE katak falsifikasaun barak iha ne’ebá,” Correa dehan Tribunál Rekursu sei fó oportunidade ba ASDT versaun João Correa ho Francisco da Silva para tur hamutuk.

Nia dehan mandatu estrutura nian kompleta ona tinan lima (5) tanba ne’e sei hala’o kongresu iha fula Abril hodi bele hetan estrutura foun hodi hasoru eleisaun parlamentar ninian. João promete ona katak sei la partisipa tan ona iha vida polítika tanba pasa vida polítika ho ema laiha kapasidade sira ne’e ulun fatuk moras. (Efrem)

Matadalan