PD Husu Jerasaun Tuan Kumpri Komprimísiu Maubisse

LOSPALOS (ANTIL)—Prezidenti Partidu Demokrátiku (PD), Mariano Assanami Sabino husu ba líder jerasaun tuan sira atu afirma sira nia pozisaun hodi kumpri komprimísiu Maubisse I no Maubisse II.

Iha komprimísiu Maubisse ne´ebé hala´o iha tinan hirak ba kotuk ne´e, Assanami haktuir, hahú tinan 2017 mai leten ne´e jerasaun tuan sira tenki deskansa ona no entrega estafeta ukun ba jerasaun foun sira.

“Ita lakohi komprimísiu bosok no gasta povu nia osan saugati ba Maubisse I no Maubisse II. Jerasaun tuan sira tenki konsistente ho sira nia komprimísiu,” nia deklara kestaun ne´e iha abertura kampaña Kandidatu Prezidenti Repúblika periodu 2017-2022, António da Coceição “Kalohan” iha Kampu Futeból Postu Administrativu Lospalos, Munisípiu Lautém, Sesta (3/3).

Tuir eis sekretáriu jerál PD ne´e katak sai prezidenti repúblika maizumenus tenki ho idade tinan 50 mai kraik, maibé liu tinan 50 ne´e tenkiser hakmatek ou deskansa ona iha uma hanesan “avó” ida.

Kandidatu Kalohan, nia dehan, kandidatu ida ne´ebé reprezenta veteranu sira no partidu hotu-hotu tanba ran Kalohan ne´e ran FRETILIN ne´ebé halo funu no FRETILIN ne´ebé hakotu funu no mós rán jerasaun Saudozu Prezidenti Nicolau Lobato. (Jornalista: Xisto Freitas / Editor: Gantry Meilana)

Foto: Prezidenti PD, Mariano Assanami Sabino ko´alia iha abertura kampaña Kandidatu António Kalohan. Foto ANTIL/Xisto Freitas