Don Norberto Tristi Ho Kondisaun Veteranu

LIQUIÇA (TATOLI) - Bispu Dioseze Maliana, Don Norberto do Amaral hateten veteranu sira ne´ebé funu hahú hosi tinan 1975 ninian ladún barak ona, tan ne´e presiza tau matan no fó onra ba sira.

“Informasaun ne´ebé maka ha´u rona katak veteranu balun moris ladún di´ak no tenki halai tuir projetu ruma maka foin heta osan hodi hadi´a sira nia moris. Laiha fasilidade hanesan uma ba sira,” Bispu hato´o kestaun ne´e liuhusi ninia omília bainhira prejidi misa solene iha seremónia haloot restus mortais hosi Munisípiu Liquiça iha Jardim dos Herois, Suku Dato, Postu Administrativu Liquiça Vila, kuarta ne´e.

Tuir Bispu katak veteranu hirak ne´e iha direitu tomak hetan previléjiu, maske iha funu laran la promete sasán sira ne´e ba malu. Maibé, agora, situasaun oin seluk no Timor iha osan.

Nia hatutan funu iha vila laran ne´e oin seluk no funu iha ailaran oin seluk. Iha Vila laran sei iha netik etu iha bikan laran hodi han no iha netik tintu hodi hemu, halo festa hodi dansa maske iha presaun nia laran. Maibé, sira iha ailaran pior liu ida ne´e.

“Ita iha osan nusa halo netik uma ne´ebé ho kondisaun ba sira ou vivenda ruma tanba sira ladún barak. Sira la liu atus rua. Tanba ita haree veteranu sira hosi nasaun eis kolonia portugés balun, sira ne´ebé luta iha ailaran ne´e ahi han rai (hetan previléjiu boot),” Don Norberto haktuir. 

Jornalista: Xisto Freitas

Foto: Bispu Dioseze Maliana, Don Norberto do Amaral iha nia omília iha misa solene ba seremónia haloot restus mortais saudozu sira hosi Munisípiu Liquiça. Imajen Ajénsia TATOLI/Xisto Freitas