CNRT Kontinua Garantia Unidade Nasionál

DILI: Partidu segundu mais votadu, Congresso Nacional Reconstrução TimorLeste (CNRT), garante nafatin unidade nasionál hodi estabiliza pás iha sosiedade nia leet hodi mantein situasaun hakmatek.

Sekretáriu Jerál CNRT, Francisco Kalbuadi Lay hatete, nu’udar partidu polítiku sira iha devér morál atu tau importánsia ba pás no estabilidade país ne’e nian hodi povu bele moris iha ámbitu dame no domin.

“Ita presiza kria ambiente ida pás, kria mós ambiente konfiansa entre partidu polítiku no sidadaun hotu-hotu”, dehan nia, hafoin soru-mutu ho Sidadaun Hadomi Pás (SHP), iha sede CNRT, Bairru Grillos, horisehik.

Nia dehan, Organizasaun Sidadaun Hadomi Pás iha hanoin di'ak atu konsolida polítiku na’in sira no sidadaun hotu oinsá atu bele kria pás no estabilidade iha Timor.

Tanba ne’e, partidu CNRT re-afirma katak prontu atu garante unidade nasionál hodi asegura situasaun ba iha povu tomak.

Iha fatin hanesan, portavós SHP, Luis Oliveira Sampaio hatete, soru-mutu entre SHP ho lider partidu polítiku no órgaun soberanu sira hodi fó korajen no forsa nafatin ba sira atu bele elabora asaun ka alternativa di'ak hodi bele hili dalan ida di'ak liu ba formasaun VII governu oin mai.

“Ita kontinua fó konfiansa ba lider polítiku sira hotu no fiar nafatin katak sira iha kometimentu ida de'it hodi asegura estabilidade no pás hodi asegura dezenvolvimentu ne'ebé ita atinje ona iha tinan 15 nia laran”, dehan nia.

Nia hatutan, kuandu iha ona estabilidade no pás, iha oportunidade mós atu bele halo diálogu halo aprosimasaun polítiku atu hetan governu ne'ebé di'ak liu iha futuru.

Luis haktuir, ideia atu haklaken unidade no pás ne’e mai husi komunidade, tanba ne’e buat hotu klaru no iha kompromisu ida de'it katak estabilidade ne’e bele apoiu liubá prosesu polítiku dezenvolvimentu ne'ebé di'ak ba Timor.

Nia mós husu ba lideransa partidu polítiku hotu atu bele respeitu rezultadu eleisaun parlamentár ne'ebé povu ezerse ona nia devér liu husi eleisaun, tanba ne’e lider sira presiza foti opsaun hodi koloka tuir desizaun tuir situasaun polítika ne'ebé povu hatuur no deside iha momentu eleisaun.

Jacinto Xavier | Independente