Timor-Leste Tenke Tau Konsiderasaun ba Mudansa

DILI, (TATOLI) – Profesór Katedrátiku, Universidade Lisboa, Luís Filipe Amado hateten mundu agora iha mudansa eh transformasaun iha polítika, ekonómika no jeopolítika  tanba ne’e Timor-Leste mós tenke tau konsiderasaun ba mudansa hirak ne’e.

“Hodi Timor-Leste bele asume nia polítika hodi adapta ho mudansa ne’ebé mak la’o”, hateten eis-ministru negósiu estranjeiru no kooperasaun Portugal ne’e iha síklu konferénsia IDN 2017 ho nia tema: Timor-Leste XXI: “Reforcar a Valorização dos Quadros” ho nia subordina ba tema:” Timor-Leste e as Novas Dinâmicas do Continente Asiático”, iha auditóriu Institutu Defeza Nasionál, Palásiu Governu, horseik.

Timor-Leste importante jere ho ekilibru nia relasaun ho estadu direferente no komunidade internasionál sira maibé relasaun dahuluk ne’ebé mak tenke estabelese primeiru mak Timor-Leste nia viziñu, Austrália no Indonézia.

“Tanba ne’e presiza fó prioridade ba relasaun sira ne’e”, akresenta ekonomista portugés ne’ebé moris iha Porto de Mós-Portugal, 17 setembru 1953 ne’e.

Nune’e mós, Timor-Leste halo aliansa no relasaun ho nasaun poténsia mundu inklui CPLP (Comunidade dos Países da Língua Portuguesa) no nasaun sira iha rejiaun Aziátika.

“Relasaun sira ne’e mak permite Timor-Leste iha ekilibru liutan ho mundu no estadu diferente sira”, reforsa tan eis-auditór iha sesaun rejionál Madeira nian husi Tribunál de Contas.

Entretantu, relasaun internasionál Timor-Leste nian konsagra ona iha nia konstituisaun, artigu 8o ne’ebé elabora husi membru asembleia konstituiante na’in 88 hafoin restaurasaun indepedénsia.

Katak, Repúblika Demokrátika Timor-Leste hala’o relasaun internasionál hosi prinsípiu independénsia nasionál, kona-ba ema hotu nia direitu,  povu nia hili rasik atu ukun an, soberania permanente povu nian kona-ba nia riku-soin no rekursu naturál sira, kona-ba protesaun ema hotu-hotu nian,  direitu kona-ba respeitu malu ba idaidak nia soberania, integridade rai-laran nian no igualdade entre Estadu sira no labele halo interferénsia iha Estadu idaidak nia lia rai-laran nian.

Repúblika Demokrátika Timor-Leste halo relasaun di’ak no harosan ho povu hotu-hotu, atu hakotu lia didi’ak kona-ba konflitu sira, hatún kilat jerál, simultáneu no kontroladu, harii sistema seguransa koletivu no hakiak orden ekonómiku internasionál foun ida atu bele kaer metin dame no justisa iha povu hotu-hotu nia relasaun ba malu.

Repúblika Demokrátika Timor-Leste hala’o relasaun privilejiadu ida ho nasaun hirak ne’ebé ko’alia lian ofisiál portugés.

Repúblika Demokrátika Timor-Leste hala’o nafatin nia relasaun babelun espesiál  no ho harosan ho nasaun viziñu sira no ho nasaun hirak ne’ebé iha rejiaun laran.

Jornalista: Rafy Belo | Editora: Rita Almeida

Foto: Profesór Katedrátiku, Universidade Lisboa, Luís Filipe Amado. Foto: IDN