Green Party hosi Austrália husu ba Governu hodi simu refujiadu rohingya rihun 20

Green Party hosi Austrália, iha loron-segunda ne'e, husu ona ba primeiru-ministru, Malcolm Turnbull, hodi simu refujiadu rohingya hamutuk rihun 20 no haruka osan ekivale euro millaun 100 ba Komisariadu Aas ONU nian ba Refujiadu (UNHCR).

"Senador Nick McKim no ha'u halo ona pedidu, eskritu, ba primeiru-ministru kona-ba krizi iha Birmánia no nível aas sira hosi deslokamentu forsadu sira ne'ebé maka ita asisti daudaun", afirma hosi Richard di Natale, líder Green Party nian, liuhosi Facebook.

"Ami presiza vistu humanitáriu permanente hamutuk rihun 20 ba refujiadu rohingya sira iha tinan ne'e no dolar australianu hamutuk millaun 150 [euro millaun 100] iha fundu sira emerjénsia nian ba UNHCR", subliña hosi Richard di Natale iha mensajen badak ida.

Apelu mosu tanba ema deslokadu kuaze rihun 300 hosi minoria musulmanu rohingya nian ne'ebé maka to'o iha Bangladexe dezde loron 25 Agostu, halai hosi violénsia iha oeste Birmánia nian.

Governu Bangladexe nian asinala ona katak, tuir "informasaun estraofisial sira", ema rohingya rihun tolu resin maka mate ona iha ofensiva militar iha estadu Rakhine, ne'ebé mosu hafoin asaltu ba postu polisial sira ne'ebé maka lansa hosi grupu ida rebelde musulmanu sira nian.

Folin ba ajuda humanitáriu ne'ebé hato'o hosi Green Party aumenta maka'as hosi folin ne'ebé maka foin hasai hosi Governu Canberra foin lalais ne'e.

Iha loron-sábadu liubá, ministra Negósiu Estranjeiru, Julie Bishop, indika ona katak Ezekutivu australianu sei haruka osan to'o dolar millaun haat (euro millaun 3,3) hodi apoia organizasaun sira ba tulun humanitáriu nian ne'ebé maka serbisu iha Bangladexe.

Ema rohingya millaun ida resin hela iha Rakhine, ne'ebé hetan beibeik diskriminasaun dezde hahú violénsia sektária iha tinan 2012, ne'ebé halo ona pelumenus ema na'in 160 mate no ema rihun 120 resin tenki hela iha kampu deslokadu hamutuk 67.

Violénsia hahú mosu bainhira hahú atake, iha loron 25 Agostu liubá, hasoru postu sira polísia nian hamutuk 30 resin ne'ebé maka halo hosi rebelde, Ezérsitu Salvasaun ba Estadu Rohingya (Arakan Rohingya Salvation Army, ARSA), ne'ebé defende direitu sira hosi ema rohingya nian.

ONU kalkula katak ema millaun ida resin, barak liu minoria musulmanu rohingya, mate ona tanba violénsia iha estadu Rakhine, númeru ida aas tebes hosi estimativu sira ne'ebé halo hosi autoridade sira Birmánia nian.

Autoridade sira Birmánia nian, ne'ebé iha 90% hosi populasaun sira hanesan budista, la rekoñese sidadania ba ema rohingya sira, minoria ida ne'ebé laiha nasionalidade no ne'ebé maka ONU konsidera hanesan etnia ida ne'ebé hetan liu perseguisaun iha planeta.

Maski sira barak hela iha nasaun durante jerasaun barak, sira laiha asesu ba eskola, ba serbisu, ba hospital sira no nasionalizmu budista ne'ebé aumenta maka'as iha tinan hirak ikus ne'e hamosu ona violénsia hasoru sira, ho konfrontu ne'ebé dalaruma hanesan mortal.

SAPO TL ho Lusa