PNTL Kontinua Investiga Kompania Hong Long

DILI — Polisia Nasional Timor Leste (PNTL) hetan autorizasaun husi Ministeiru Publiku (MP) atu halo prosesu investigasaun ba kompania Internasional Hong Long seidauk remata neebe mak halao nia aktividades Peskas nian iha Tasi Timor.

Liafuan hirak nee hatoo husi Komisariu Jeral PNTL Julio Hornai ba jornalista sira depois remata enkontru ho Prezidente Republika Francisco Guterres Lu-Olo iha Palasiu Prezidente Bairo-Pite Dili Kinta, (21/9/2017).

Tuir nia katak polisia kaer kompania Hong Long neebe kaer projeitu kaer ikan iha Timor. Oras nee dadaun PNTL sei halo remata ninia investigasaun no rejultadu ikus sei hatoo ba Ministeiru Publiku.

Tanba Ministeriu Publiku maka nain ba prosesu nee. Laos parte polisia maka naran tur no hanoin halo servisu ida nee maibe tanba bazeia ba Ministeiru Publiku nian. No, liu husi prosesu sira nee maka bele hatene iha relasaun ho kaer ikan protejida ou lae iha tasi laran.

Oras nee dadaun PNTL seidauk bele koalia uluk kuandu prosesu kaju nee seidauk remata maibe iha investigasaun nia laran maka bele hatene kompania Hong Long nee nia kontratu ho governu nusa no nia halao nia aktividade iha terenu oinsa. Maibe iha investigasaun nia laran maka hetan aktus kona ba kaer ikan protezidu nee kontra lei ou la kontra lei,” dehan Komandu PNTL.

Komandu Jeral PNTL nee mos informa mos konaba PNTL husi Munisipiu Baucau neebe kaer mos kompania Hong Long mos oras nee dadaun hahu nia prosesu lao hotu ona. Sei hare kompania nia kontratu ho governu Timor Leste han malu ka lae. Tanba nee prosesu hotu-hotu sei lao hela nafatin no iha rejultadu ikus maka sei hare los.

 “PNTL kaer kompania Internasional Hong Long tanba kaer ikan protezidu, ida nee ami simu autorizasaun husi Ministeiru Publiku atu ami ba halo identifikasaun depois rezultadu ikus ami sei hatoo fila fali ba Ministeiru Publiku tanba sira maka nain ba prosesu,”nia dehan. 

Justinho Manuel | Suara Timor Lorosae