Setor Privadu Hahu Investe Peskas

DILI - Atu labele depende makaas ba importasaun ikan husi rai liur mai Timor Leste maka, setor privadu hahu investe iha area peskas hodi hakiak ikan atu kompete iha merkadoria.

kestaun nee fo sai husi Ministru Estadu Koordenador asuntu ekonomia, e Ministru agrikutura e peskas, Estanislau da Silva ba STL, Segunda (28/08/2017) iha nia knaar fatin MAP.

“Ami orgullo tanba setor privadu balun hahu investe iha area peskas liu husi, hakiak ikan hodi faan iha merkadu rai laran, ida nee ho objektivu atu redus importasaun ikan husi rai liur mai TL. No Nasaun balun mos hahu husi TL atu halo exportasaun Ikan ba rai liur,” informa Ministru Estadu Koordenador asuntu ekonomia, e Ministru agrikutura e peskas, Estanislau da Silva.

Nia mos informa tan katak, agora dadauk peskas illegal iha Costa Sul hahu lakon ona, tanba hetan kontrola masimu husi Roo ahi neebe iha, tan nee too ona tempu setor privadu rai laran atu hola parte iha area peskas.

Iha fatin hanesan membru CCI-TL, Adelio da Costa hateten, partesipasaun setor privadu sira nian iha area peskas nee sei kiik tebes.Tanba nee, too ohin loron ikan importasaun maka domina iha merkadu rai laran, tanba setor privadu barak maka hola parte liu iha area konstrusaun.

“Ita investe iha setor peskas nee diak tanba, hetan rendimentu direta no la liu husi prosesu naruk, konforme ikan neebe ita hakiak kuandu boot ona maka tenke halo koileta tiha, no hakiak fila fali balun neebe sei kiik,”informa nia.

Nunee mos Vice prezidente CCI-TL, Rui Castro hateten prezensa setor privadu nian laos investe deit, iha area peskas maibe barak maka investe iha area pekuaria liu liu hakiak animal hanesan fahi, karau no sira seluk tan nee setor privadu sira hahu hakat neneik ba oin. 

Madalena Horta | Suara Timor Lorosae