Presiza Dezenvolve Diak liu Tan Ensino Vokasional

Rede edukasaun Timor –Leste Coalition for Education (TLCE) husu governu foun mai atu kontinua tau matan ba ensino vokasional sira iha rai laran, ne’ebe governu (ida ne’e) estabelese ona.

Iha tinan ikus mandatu governu ida ne’e nian, nia dehan Ministerio Edukasaun konsege halo ona transformasaun ensino sekundario jeral lubuk ida ba fali ensino vokasional, ho objetivu atu prepara joven sira ba iha kampu de trabalho.

Politika redus ensino sekundariu jeral ne’e pozitivu tebes, maibe tuir Jerente Programa Edukasaun TLCE, Matias dos Santos katak presiza dezenvolve diak liu tan ensino vokasional intermus forsa trabalho, fasilidade no ekipamentus pratika sira.

“Ita lakohi ita nia labarik sira hetan ijasah maibe skill laiha atu kompete iha merkadu, entaun governu presiza hadia mekanismu hodi hadia diak liu tan,” nia sujere, iha Dili.

Nia hateten, iha ensino vokasional balun sei hanorin hanesan ensino jeral tanba falta profesores, livrus no laboratorium atu halo pratika hodi haklean sira nia konesementu iha siensia.

Entretantu, joventude Comoro Jose Amaral husu governu foun atu kontinua politika ne’e liu –liu hadia kondisaun eskola vokasional sira nian labele halakon fali, tanba positive tebes atu forma ema iha area espesializada.

“Ita espera, governu foun mai bele kontinua ida ne’e hodi dezenvolve diak liu tan,” nia esperansa.

Nia hateten, politika ida ne’e bele kontribui mos ba redusaun dezempregu iha rai laran tanba joven barak mak iha ijasah, maibe laiha skill atu kompete iha merkadu.

Nia hatutan, prosesu aprendizajen iha ensino vokasional iha rai laran seidauk la’o diak.

Paulina Quintão | The Dili Weekly