Opozisaun Sei Vota Afavór ba Mosaun Rejeisaun

DILI, (TATOLI) - Deputadu Parlamentu Nasionál, hosi bankada CNRT, Aderito Hugo da Costa afirma katak, deputadu sira hosi opozisaun sei vota afavór ba mosaun rejeisaun ne’ebé submete ona iha meza Parlamentu Nasionál.

“Mosaun rejeisaun ne’ebé opozisaun aprezenta sei hetan votu afavór hosi bankada opozisaun hanesan CNRT, PLP, no KHUNTO, kompostu hosi deputadu nain 35,” Aderito Hugo da Costa informa ba TATOLI, ohin iha Parlamentu Nasionál.

Nia dehan, rejeisaun hatama tanba tuir rejimentu no konstituisaun, bazeia ba ida mak bankada opozisaun hosi CNRT, PLP, ho KHUNTO aprezenta ba meza ho asinatura hosi xefe bankada Nain tolu, Arão Noé, Xefe bankada CNRT, Fidelis Magalhães, xefe bankada PLP, Luis Roberto, Xefe bankada KHUNTO.

“Direitu ba aprezentasaun mosaun ne’e bankada, tanba ne’e xefe bankada Nain tolu ne’e mak asina.”

Xefe bankada Partidu Demokrátiku, Maria Tereza defende katak, programa sétimu governu ne’ebé aprezenta ona iha “ambisaun” hanesan opozisaun dehan, maibé Ambisaun ne’ebé governu iha pozitivu atu hadi’a hodi povu nia moris la’ós, governu mai ho programa ida atu sobu de’it.

“Ita la bele konfunde ambisaun ho ganância, tanba ganância bele lori ita monu ba sala,” Maria Tereza fó hanoin.

“Ha’u lá fiar maun boot Xanana kontra projetu tasi mane, no maun Taur Matan Ruak kontra dada bee mós ba povu.”

Relasiona ho ida ne’e, Primeiru Ministru, Mari Alkatiri, konsidera intervensaun sira ne’ebé mak deputadu sira halo favoravel  hotu tanba ne’e nia sei halo nia mensajen ba povu iha oras hira tuir mai.

Jornalista: Julia Chatarina | Editór: Manuel Pinto

Foto: Deputadu Parlamentu Nasionál, hosi bankada CNRT, Aderito Hugo da Costa