Selebra Tinan 90 “Híbrido de Timor” Ho Abertura Festivál Kafé Iha Fatubesi

DILI, (TATOLI) – Festivál Kafé Timór 2017 sei halo abertura iha suku Fatubesi, postu administrativu Hatolia, Autoridade Munisipál Ermera iha loron 21 outubru hodi  selebra tinan 90 “Híbrido de Timor”.

Vise-Prezidente Asosiasaun Kafé Timor-Leste (ACTL-sigla iha portugés), Afonso de Oliveira, informa ne’e eventu ida ne’ebé ACTL halo atu promove   Kafé Timór ba merkadu internasionál.

“Ne’e importante no kafé inan ne’e iha ne’ebá (Fatubesi), entaun ami lori ema ne’e ba haree rasik no tanbasá mak bolu Kafé Híbrido de Timor, tanba até agora Timór barak mak lakoñese razaun fundamentál ita bolu Híbrido de Timor”, Afonso hatete iha Fomentu, ohin.

Aleinde ne’e atu fó koñese sobre Kafé Timór, ACTL mós daudaun ko’alia ho Organização das Nações Unidas para a Educação, a Ciência e a Cultura (UNESCO) atu lori “Híbrido de Timor” sai patrimóniu mundiál no halo sai mós hanesan fatin turizmu lokál.

Afonso hatutan antes hahú  festivál sei halo semináriu hodi fó koñesimentu ba komunidade kona-ba saida mak “Festivál Kafé Timór” no “Kafé Híbrido de Timor”.

“Depois ita lori ema barak husi rai-liur, espertu internasionál hodi koko Kafé no sira mós sosa-na’in Kafé iha rai seluk, entaun sira mai partisipa no identifika ita-nia kafé ne’ebé mak kualidade di’ak no sira bele estabelese akordu ho ACTL katak kafé ida ne’e di’ak no ami presiza ida ne’e, entaun ne’e buat ida di’ak”.

Ezisténsia ACTL mak oinsá promove kafé nomós kuantidade no kualidade kafé nian para bele tau kafé iha merkadu internasionál hanesan marka ida.

“Ne’e mak ami envolve ema hotu iha indústria kafé nian hanesan toos-na’in sira, sosa-na’in, no esportadór para bele ajuda ita-nia produtór para hadi’a kualidade”.

Eventu ida ne’e sei halo road show husi Fatubesi bá to’o iha Maubisi hodi anúnsiu rezultadu finál sabór kafé husi munisípiu ne’ebé mak sai mellor liu.

“Ami iha amostra kafé 75, no espertu internasionál sira iha ne’e no halo preparativu kuaze loron tolu ona. Sira sei koko kafé entaun kafé ida tinan ikus ne’e nafatin primeiru lugar ka tun oan, ka sira uluk tun ne’e sa’e fali. Sé nia nafatin primeiru signifika di’ak, sé la’e ami tenke haree tanba sadia mak nia pontu ne’e tun, ne’e importante tebes mai ami”.

Eventu nee sei realiza ho eventu barak hanesan kompetisaun kafé husi barista sira, feira no ezebisaun fotografia, iha semináriu no eventu ba cocktail. Festival Kafé Timor sei halo husi loron 21 to’o 28 outubru 2017.

Jornalista: Maria Auxilidora | Editora: Rita Almeida

Foto: Vise-Prezidente Asosiasaun Kafé Timor-Leste, Afonso de Oliveira. Foto/FKT

Notísia ne’ebé relasiona: ACTL Lansa Kompetisaun Festivál Kafé