Mari Alkatiri hatete katak iha garanti hosi CNRT ba apoiu ba programa ho Orsamentu

Primeiru-ministru timoroan, Mari Alkatiri, hatete iha loron-kuarta ne'e katak Xanana Gusmão, prezidente hosi partidu boot opozisaun nian, CNRT, garanti ona ba nia apoiu total ba programa ho ba Orsamentu Estadu nian, katak Governu presiza tanba hanesan minoritáriu iha parlamentu.

"Xanana Gusmão hatete mai ha'u katak ajuda ha'u garanti programa ho Orsamentu Estadu nian. Ha'u hatete katak ha'u laiha deputadu na'in 33 [maioria] no nia hatete: 'lalika preokupa'", nia hatete iha intervensaun ida iha Parlamentu Nasional.

Alkatiri hatete katak nia hein Xanana Gusmão fila ba Timor-Leste - agora daudaun halo hela vizita iha Madeira - hodi nune'e, hamutuk, bele esplika ba sosiedade timoroan kona-ba kompromisu sira ne'e.

"Laiha segredu. Ne'e maka realidade. Ne'e maka kompromisu ho irmaun Xanana Gusmão no ne'ebé maka agora ha'u fó sai", afirma hosi líder Governu nian.

Alkatiri nia komentáriu sira, iha loron datoluk konsekutivu debate nian kona-ba programa ezekutivu nian iha Parlamentu Nasional, akontese iha momentu ne'ebé maka opozisaun maioritáriu harii Aliansa Maioria Parlamentar (AMP) ida no hakarak sai hanesan alternativu Governu nian.

To'o agora laiha partidu ida hosi AMP - Congresso Nacional da Reconstrução Timorense (CNRT), o Partidu Libertasaun Popular (PLP) ho Kmanek Haburas Unidade Nacional Timor Oan (KHUNTO) - konfirma ona katak hakarak ka la'e aprezenta proposta rejeisaun nian kontra programa.

Bainhira iha proposta rejeisaun rua, Governu tuun.

Alkatiri refere mós ba komentáriu sira hosi elementu balun hosi opozisaun ne'ebé kritika nafatin konstitusionalidade hosi nomeasaun ne'ebé halo Prezidente Repúblika ba Governu minoritáriu ida: Fretilin ho PD ne'ebé kontrola de'it fatin 30 hosi fatin 65 iha parlamentu.

Dezde Governu simu pose maka aumenta nafatin komentáriu sira iha Timor-Leste kona-ba interpretasaun oioin hosi Konstituisaun timoroan nian kona-ba formasaun Governu nian.

Iha konkretu, artigu 106 ne'ebé indika katak xefe Estadu fó pose ba primeiru-ministru ne'ebé aprezenta hosi partidu ne'ebé hetan liu votu ka hosi aliansa ida hosi maioria parlamentar.

Maski artigu ne'e la eziji atu partidu ne'ebé hetan liu votu hanesan maioria, artigu 85 ladún klaru tanba hatete katak Prezidente Repúblika iha kompeténsia "nomeia no fó pose ba primeiru-ministru nomeadu hosi partidu ka aliansa partidu sira ho maioria parlamentar".

Kona-ba tema ne'e, Alkatiri hatete iha loron-kuarta ne'e katak bainhira iha dúvida entaun opozisaun "lori asuntu ba Tribunal Rekursu ne'ebé maka tenki desidi".

"Ha'u prontu hodi respeita desizaun ne'e", nia afirma.

Hafoin intervensaun, Mari Alkatiri hetan felisitasaun hosi membru sira Governu nian no hosi deputadu sira hosi partidu rua ne'ebé maka apoia koligasaun, Frente Revolucionária do Timor-Leste Independente (Fretilin) no hosi Partidu Demokrátiku (PD), no sai emosionadu hosi sala plenáriu nian.

SAPO TL ho Lusa