Polemika Governu, Setor Privadu “Nakdoko”

DILI — Setor privadu preokupa tebes  ho polemika Formasaun Setimu VII Governu Konstitusional neebe lao iha rai laran, impaktu husi inserteza  formasaun governu, setor privadu  balu “nakdoko”  komesa dada sira nia osan husi Timor Leste tanba Administrasaun publiku   la funsiona.

Tuir Vise Prezidente Camara Comersiu Industria TL, CCI-TL, Rui Castro isu formasaun setimu governu neebe  seidauk final, to  ona impaktu boot ba Administrasaun governu nian la lao, nunee setor privadu balu ladun laran metin, atu investe iha iha TL.

Setor privadu barak maka hasai dadauk ona sira nia osan husi Timor, tan nee husu  lideransa sira se bele formasaun governu nee lalais uituan, nunee bele fo garantia ba investidor sira,” dehan Rui Castro ba STL Tersa (10/10/2017) iha Timor Plaza.

Vise Prezidente CCI-TL nee informa, setor privadu Timor oan sira sente estabilidade hela maibe, investidor sira husi rai liur sente la seguru atu halao atividade iha rai laran, maske imprezariu nasional sira sente bain-bain deit, tanba toman no fiar aan hanesan timor oan.

Politika ida hanesan nee, laos foin akontese iha tinan ida nee maibe, kuaze bain bain tiha ona,  no Timor oan maka tenke hateten ba iha publiku katak estabilidade iha rai laran nee garantia hela, no husu mos ba politik nain sira atu bolu malu koalia didiak ba malu, tanba hotu-hotu mesak Timor oan,” dehan Rui.

Rui Castro apela ba Politik nain sira atu tur hamotuk hodi koalia ba malu  didiak, basaa mesak Timor oan hotu deit.  Labele  tan deit politiku sira nia atetude, halo povu barak sofre, karik kadeira la too bele halo tan kadeira  nunee povu bele moris iha estabilidade nia laran.

Iha fatin hanesan Eis Ministru Ekonomia Dezenvolvimentu, Joao Goncalves dehan, ema hotu hein hela formasaun governu foun ida nee, maibe problema sira nee bele rezolve, ema hotu hakarak tau interese nasional  importante tebes, tan nee politika sira nee bele fo impaktu ba movimentasaun ekonomia iha rai laran.

Ita preokupa maka karta neebe opozisaun sira lori ba iha Prezidente da Republika, ida nee hanesan ameasa boot ida maibe, buat hotu atu lao diak e depende ba lider politik nain sira  oinsa atu tur hamotuk, nunee bele haree oinsa  formasaun governu nee bele lao diak,” tenik Joao.

Nia mos informa katak, opozisaun sira mos deklara ona katak lakohi eleisaun antisipa atu akontese nunee parte hotu  tenke buka dalan ida neebe diak atu nunee labele halo povu paniku.

Madalena Horta | Suara Timor Lorosae