DILI,
(TATOLI) – Prezidente Parlamentu Nasionál (PN), Aniceto Longuinhos
Guterres no Sekretáriu Jerál PN hakerek ona karta ba deputadu lejizlatura
datoluk sira atu entrega kareta PRADO ne’ebé durante ne’e uza.
“Ohin
duni ha’u hakerek karta ba deputadu terseira lejizlatura hosi partidu CNRT,
FRETILIN, PD no Frente Mudansa no iha karta ne’e husu ba deputadu terseira
lejizlatura atu kolabora ho Parlamentu Nasionál atu entrega kareta”, hatete
Aniceto ba jornalista sira iha Palásiu Prezidente Nicolau Lobato Bairru Pité,
kuarta ne’e, hafoin sorumutu ho Prezidente Repúblika, Francisco Guterres Lú
Olo.
Aniceto
hein katak ho karta ida ne’e eis deputadu bele entrega kareta no bainhira
seidauk entrega Prezidente PN sei hasai tan karta hodi fó prazu.
Biban
ne’e, Prezidente órgaun lejislativa esklarese, PN konvida ona
reprezentante estudante hodi hasoru malu ho prezidente PN no líder bankada
lima. Enkontru ne’e, parte rua (PN no reprezentante estudante) seidauk konkorda
malu tanba estudante sira kontinua la aseita sosa kareta foun, entretantu
deputadu sira hakarak kareta foun.
“Nu’udar
sidadaun, sira iha direitu atu hato’o opiniaun maibé hakarak hateten loloos
katak kareta tuan ne’e hasai despeza boot liu duké sosa kareta foun”, afirma.
Maibé,
nia hateten, maske seidauk to’o iha konsensu ida maibé PN nakloke án nafatin
nu’udar uma fukun povu nian atu simu kualker opiniaun.
Kona-ba
sorumutu ho Prezidente Repúblika, nia hatán, enkontru ne’e nu’udar enkontru
kinjenál (enkontru kada loron 15) ho Prezidente Repúblika, Francisco Guterres
Lú Olo hodi hato’o kona-ba andamentu funsionamentu PN nu’udar órgaun Estadu.
“Ha’u
hateten ba Parlamentu Nasionál katak Parlamentu funsiona normál hela, plenária
la’o hela no reuniaun komisaun espesializada mós la’o hela no konsege reuni ona
ho membru governu sira”, haktuir.
Jornalista:
Xisto Freitas | Editora: Rita Almeida
Foto
Espesial.
Lee
liu iha TATOLI
Sem comentários:
Enviar um comentário