NAKROMA II ho HAKSOLOK Espesifikasaun Modernu

DILI, (TATOLI) - Vise-ministru Obras Públika, Transporte no Komunikasaun, Inácio Moreira informa katak ró Berlin Nakroma II no ró HAKSOLOK ne´ebé nia produsaun iha Portugál ne´e, nia espesifikasaun dezeñu no modelu modernu, tanba ne’e bele halo mós operasaun iha Kosta Sul, tasi mane kompara ho Berlin-Nakroma I ne´ebé apoiu husi governu Alemaña antes ne´e.

“Ha´u hanoin importante, para ita bele haree i ita hotu-hotu hatene, ita-nia ró seluk ne´ebé oras ne´e daudaun ita hein hela, iha Portugal, ró ne´e nia espesifikasaun mós modernu, serve mós atu halo operasaun iha tasi ho ondas boot hanesan tasi mane,” Inásiu Moreira informa perante media sira iha Hotel Timor, Sesta (010/11).

Nia hateten, ba oin la´ós ró pasajeiru de´it mak presiza maibé presiza mós ró tula sasán nian (kargeiru-red). “Ba oin konserteza, hakarak ka lakohi ita tenke prepara duni tanba nasaun.”

Alende ró sira ne´e, nia dehan oras ne´e daudaun mós governu Alemaun ajuda Timor, instala tiha ona sentru formasaun espesiál ba iha hanorin atividade Marítima ninian.

Iha sentru formasaun ne´e, sei prepara ema liuliu joven mane eh feto sira, nu´udar rekursu mós hodi serbisu no hala´o atividade iha tasi laran iha futuru.

“Ne´e mak instala tiha ona iha Tibar i oras ne´e daudaun ita-nia joven timoroan lubuk ida mak tuir hela formasaun,” Inásiu dehan tuir.

Objetivu hosi formasaun sira ne’e atu prepara responde situasaun, ba ró hotu-hotu. lori ró, bele halo serbisu iha ró sira ne´e i seluk tan mak, kondisaun infraestrutura ba iha atividade tasi nian.

Kestaun importante seluk ne’ebé mak Governu sei halo iha sétimu governu mak atu fasilita servisu ne´e no konekta ró sira durante halo operasaun, liuhosi fasilidade portu nian. Servisu refere ohin loron haree hanesan daudauk Portu Dili no Portu Tibar ne’ebé oras ne’e halo hela prosesu aprovizionamentu ba sub-kontratór, Dezembru ne´e, bele asina ona kontratu, ba kontratór ne´ebé manan bele fó ona kontratu ba iha sub-kontrator ne´ebé atu konstrui ba iha Portu Tibar nian.

Entretantu Portu Tibar, governu Timor-Leste asina ona akordu hodi halo parseiru ofisiál, iha Juñu 2016 ho konsórsiu Bolloré.

Investimentu inisiál ba konstrusaun ne’e mak osan hamutuk dolar millaun 278.3. Husi valór ne’e, dolar millaun 148.85 fornese husi parseiru privadu, konsórsiu Bolloré, no dolar millaun 129.45 governu Timor-Leste maka sei kontribui.

Konstrusaun portu ne’e nian sei hahú iha 2017 no remata iha tinan tolu nia laran. Obra ne’e sei kria kampu serbisu ba ema 1.000 resin. husi númeru ne’e, ema 500 sei hahú serbisu durante faze konstrusaun nian no ema 350 iha operasaun portu ne’e nian durante tinan haat dahuluk no sei aumenta tan 150 iha faze tuirmai ho prioridade ba sidadaun Timor-Leste.

Terminál ho nivel internasionál ne’e sei inklui ponte-kais rua ho medida metru 630 no terminál kontentór nian ne’ebé tinan-tinan, tuir previzaun, bele simu kontentór 870,000 resin to’o konsesaun durante tinan 30 nian remata. Alende ne’e sei iha mós edifísiu ba alfándega, Administrasaun atu fó apoiu ba operasaun fasilidade hirak ne’e. Iha projetu fó mós espasu atu halo luan liután iha futuru, bainhira governu hakarak hasa’e portu Tibar nia kapasidade operasaun.

Fundu ba terminál ró nian ne’ebé lokaliza besik portu Dili, apoia husi Japaun ho fundu montante 2.197 yen (maizumenus millaun 20 dolar amerikanu).

Serbisu konstrusaun sei kaer husi Tobishima Coorporation husi supervizaun husi Ides Inc ho Japan Port Consultants Ltd. Terminál ne’e sei harii ho naruk maizmenus metru 100 ho luan metru 20 ne’ebé bele akomoda ró rua durante 24 oras nia laran.

Plataforma ho rai ne’ebé bele muda ba mai ho medida 55m X 25m. Fasilidade ne’ebé presiza mak sistema eletrisidade no bee moos, hamate ahi nó mós ekipamentu seguransa. Projetu ne’e sei kompleta iha marsu 2019.

“Ita hein tinan rua tolu ba oin, ita-nia portu multi-funsaun bele prontu ita halo atividade transportasaun, ró sira ne´ebé ba mai hodi transporta sasán bele di´ak liután,” Inásiu espera.

Ba Portu Dili, Governu mós prepara daudauk kondisaun infraestrutura ninian hanesan governu Japaun fó mós grant ba ita, oras ne´e daudauk halo hela konstrusaun jiti ka fasilidade ba ró ne´ebé lori pasajeiru.

Hein katak jiti ne´e bele finaliza iha tinan oin, hodi bele organiza didi´ak hodi fó dignidade ba pasajeiru sira ne´ebé ba mai Oe-cusse, Atauru nó mós bele ba mai Kosta Súl. “Ne´e mak purenkuantu planu governu ninian,” governante ne´e subliña.

Jornalista: Rafy Belo  | Editór: Manuel Pinto

Foto: Vise-Ministru Obra Públika, Transporte no Telekomunikasaun II, Inácio Freitas Morreira. Foto/António Gonçalves.