CNE Husu ParPol Sira Kumpre Regras Vigor

DILI, (TATOLI) – Komisaun Nasionál Eleisaun (CNE-sigla portugés) hala’o sorumutu ho Partidu Polítiku (ParPol) no koligasaun partidária sira konaba regras kampaña eleitorál, biban ne’e Prezidente CNE, Alcino Barrís husu ParPol sira kumpre regras ne’ebé vigor.

“Husu ba ParPol sira atu kontrola no kumpre nafatin regras ne’ebé vigor tanba iha preokupasaun no kontestasaun husi PaPol”, tenik iha konferénsia imprensa hafoin remata sorumutu iha CNE, ohin.

Husi parte ParPol balun sira dehan, tanba  daudaun ne’e iha hela faze konsolidasaun ba ParPol ida-idak tanba  ne’e iha lala’ok ruma konaba aktu eleitorál nia sira fó informasaun ba apoiante sira iha sede.

Ho períodu kampaña eleitorál iha loron 10 Abríl to’o 9 Maiu, ParPol sira konsente sidauk to’o tempu atu sira sai ba públiku halo propaganda eleitorál.

Maski nune’e reprezentante husi ParPol sira ho hanoin hanesan katak sei respeita regra no hakarak eleisaun la’o ho di’ak.

“Ohin husi reprezentante ParPol sira hotu ko’alia ho liafuan hanesan katak hakarak respeita regra no hakarak eleisaun ne’ebé la’o ho di’ak no garante kualidade ho di’ak, nune’e parpol sira hotu tenke respeitu regras konaba lalauk eleitorál nian”, nia dehan.

Parte seluk, reprezentante husi Aliansa Mudansa ba Progresu-AMP (Partidu CNRT, PLP no KHUNTO), Arão Noe hateten enkontru ParPol ho CNE importante tebes no espera inisiativa ne’e bele la’o regular hodi konsolida nafatin entendimentu entre ParPol sira alende ne’e atu labele iha disturbus iha komunidade nia let.

“Enkontru ne’e atu fó hanoin ba partidu sira atu tuir regras legais ne’ebé iha, atu labele mosu problema iha kraik”, tenik.

Entretantu bazeia ba kalendáriu eleitorál oras ne’e daudauk  iha hela faze preparasaun hodi konklui lista kandidatura no koligasaun ParPol sira ne’ebé remata iha loron 12 Marsu no inskrisaun ba ParPol sira sei remata iha loron 22 Marsu.

To’o agora, CNE lista ona partidu koligasaun haat mak hanesan Frente Dezenvolvimentu Demokrátiku (FDD), Partidu Unidade Dezenvolvimentu Demokrátiku (PUDD), Partidu Dezenvolvimentu Nasionál (PDN) no Aliansa Mudansa ba Progresu (AMP), enkuantu ParPol ne’ebé mak deside avansa mesak mak FRETILIN, PD, PEP no PR.

Jornalista: Julia Chatarina | Editór : Manuel Pinto

Imajen: Sesaun foto hamutuk Prezidente CNE, Alcino Barris ho ParPol no koligasaun partidária hafoin sorumutuk iha salaun CNE. Foto Tatoli/ Egas Cristovão