DILI, (TATOLI) – Prezidente
Partidu Demokrátiku (PPD), Mariano Asanami Sabino informa, maski partidu
demokrátiku seidauk aprezenta lista ba Tribunál Rekursu, maibé ba Eleisaun
Antisipada (EA) PD konsistente nafatin ho lista uluk ne’ebé kompete iha
eleisaun jerál 2017.
“Kona-ba kompozisaun lista
deputadu parlamentár, PD konsistente nafatin ho lista uluk tanba lakohi iha
diskriminasaun,” Assanami garante ba Jornalista sira iha Lesidere, Segunda
(12/03).
Nia dehan iha tempu badak PD sei
submete lista deputadu ba órgaun kompetente, ho kompromisu ida ba rai ida ne’e
atu realiza mehi funu na’in sira hodi konstrui Estadu Repúblika Demokrátika
Timor-Leste (RDTL), kontinua konsistente no firme hodi haburas multi partidáriu
no multi organizasaun ne’ebé hatuur ona iha konstituisaun kona-ba multi
partidária mak prinsípiu ba konstrusaun Estadu.
PD hanesan lokomotivu ba ema hotu
ne’ebé hakarak halo mudansa, hakarak halibur, hametin no hakuak ita nia
sosiedade tomak hodi harii Timor foun ida ba Timoroan tomak.
“PD mesak labele tanba ne’e ami
tau PD nu’udar lokomotivu ba ema hotu, imi bele partidu oioin maibé votu ba
eleisaun antesipada (EA) hanesan afirmasaun katak povu tenke hamriik atu halo
mudansa ba rai ida ne’e,” Assanami afirma.
Povu mak ukun nian na’in no votu
ne’e empresta atu serve povu la’ós atu ba arrogánsia, la’ós atu ba indivíduu,
la’ós atu personifikasaun ema, maibé ukun ne’e povu nian.
Tanba ida ne’e, Assanami husu ba
povu tomak iha Eleisaun Antisipada la bele vota ho emosaun, triste e vota tanba
ema konta istória, maibé tenke vota ho rasiosíniu.
“Husu ba povu liuliu intelektuál,
juventude, mídia atu hamutuk hodi rasionaliza demokrasia, rasionaliza votu povu
nian katak povu vota ba bee moos, vota ba estrada, vota ba moris di’ak, vota ba
ekonomia, vota ba atu kria kampu servisu, vota ba estabilidade, seguransa no
justisa ba ema hotu, enkuantu la’ós vota tanba emosaun, triste no konta
istória,” Mariano Asanami fó hanoin.
Ba PD povu mak nia aliadu, PD iha
EA sei la halo aliansa ho partidu ne’ebé de’it. PD konsistente kaer programa
ne’ebé iha ona no planu estratéjiku ne’ebé durante PD ho Kongresu Nasionál
Rekonstrusaun Timorese (CNRT- Sigla-Portugés) halo iha tinan 2009-2011.
Entretantu, PD harii iha 2001
nu’udar opozisaun segundu iha parlamentu ho votu 31 mill, iha 2007 ho votu 45
mill, 2012 ho 48 mill no 2017 ho 56 mill.
Jornalista: Zezito Silva | Editór:
Manuel Pinto
Imajen: Prezidente Partidu
Demokrátiku, Mariano Assanami Sabino ko'alia ho jornalista sira iha Palásiu
Prezidensiál. Foto Tatoli/Xisto Freitas
Sem comentários:
Enviar um comentário