DILI, (TATOLI) – Primeiru
Ministru, Marí Alkatiri, hateten akordu Ketan Tasi (Fronteira Marítima) ne’ebé
Timor-Leste no Austrália asina iha Nova Iorke, Estadus Unidus Amérika, iha
loron 6 fulan-marsu liu-ba limita rendementu ekonómiku iha posu Greater
Sunrise.
Marí esplika akordu jurídika
legál iha tratadu ne’e limita rendementu ekonómiku ba pursentu 80 ka 70,
ne’e aban bainrua Timor-Leste negósia fali atu hetan pursentu boot labele ona.
“Ne’e maka ita bolu peñor, tanba
aban bainrua ita ba negósia fali atu hetan boot liu labele ona”, Xefe Governu
ba jornalista sira iha Palásiu Prezidente Nicolau Lobato, Bairru Pité, tersa
ne’e, bainhira hatán adversáriu polítiku sira nia argumentu katak nia ho Eis
Ministru Negósiu Estranjeiru, José Ramos Horta, peñor ona fronteira marítima ba
Austrália.
Nia konsidera argumentu ne’e
hanesan propaganda polítika baratu, tanba laiha ona programa atu ko’alia. “Se
peñor karik laiha ema ida atu reklama ba Austrália atu diskute fronteira
marítima”, katak tan.
Xefe Ezekutivu ne’e dehan se nia
maka hakarak kadoras Greater Sunrise ba Austrália, esplorasaun ba posu minarai
Greater Sunrise hahú kle’ur ona, maibé tanba nia hakarak mai Timor-Leste,
entaun paradu.
Marí haklaken nia kontinua
defende Kadoras Greater Sunrise mai Timor, tanba ne’e liga ba kestaun
prinsípiu.
Jornalista: Xisto Freitas | Editora:
Rita Almeida
Imajen: Primeiru Ministru (PM),
Marí Alkatiri
Sem comentários:
Enviar um comentário