UNITAL Lori Estudante Serbisu Hamutuk Komunidade

BATUGADE, (TATOLI) - Universidade Orientál Timor Lorosa’e [UNITAL], Fakuldade Ekonomia, Departamentu Turizmu no Jestaun Turístika, lori estudante na’in 80 no alumni na’in neen hodi serbisu hamutuk ho komunidade Suku Aidaba Letan, Postu Administrativu Atabae, Munisípiu Bobonaro, durante fulan ida semana rua.

Estudante sira ne’e, hahú Sesta ne’e, halo prátika no aplika teória ne’ebé hetan iha aprendizajen.

“Husi atividade ne’ebé mak estudante atu mai hala’o iha ne’e sobre buat ida praktek bimbingan lapangan [prátika orientasaun terenu] oinsa estudante atu kuñese kle’an, interligadu entre estudante ho komunidade,” hateten xefe departamentu Jestaun Turístika, Elvino do Santos, ba Ajénsia TATOLI, iha Suku Aidaba Leten-Atabae, ohin.

Xefe Elvino dos Santos akresenta, iha komunidade nia leet, estudante presiza implementa teória ne’ebé mak sira hetan iha estudu depois implementa iha  Suku Aidaba Leten, maibé interligadu ba iha área turizmu ninian.

Ho ida ne’e maka husi área potensialidade turizmu iha Suku Aidaba Leten ninian, estudante kompostu husi 80 pessoas no alumni na’in neen, sira hamutuk 86 pesoas, ne’ebé mak sei halo atividade durante fulan ida semana rua.

Depois remata ida ne’e, sira presiza tenke halo relatóriu ida ba iha universidade, ba iha departamentu no fakuldade hodi attach point [aneksa pontu] ba iha ANAA [Ajénsia Nasionál ba Avaliasaun no Akreditasaun-sigla iha portugés] atu halo akreditasaun ba departamentu, ba iha universidade hothotu iha Timor-Leste inklui mós departamentu Jestaun Turístika.

“Foin dadauk ami iha ona avaliasaun, ami hetan ona akreditasaun no hala’o atividade ne’e atu haforsa liutan, bele aumenta liutan point ba iha akreditasaun ninian,” nia haktuir.

Ne’e mak husi Universidade Orientál Timor Lorosa’e [UNITAL], Fakuldade Ekonomia, lori estudante hirak ne’e par abele hatene kona-ba oinsa estudante nia [Community Engaggement], oinsa serbisu hamutuk ho komunidade.

“Entaun, ohin loron ida ne’e ami lori estudante mai atu serbisu hamutuk ho komunidade praktek binbingan lapangan,” konklui Xefe Departamentu Jestaun Turístika, Elvino do Santos.

Xefe Grupu Estudante, Angelino de Jesus Siqueira informa katak durante iha Suku Atabae, iha aldeia Bekou, Migir, Tutubaba, Tasimean no Surilaran, sira sei observa fatin liliu objetu turístiku ne’ebé mak eziste iha fatin ida ne’e, sai hanesan patrimónia nasaun ida ne’e nian.

“Ami hanesan estudante liliu ba iha área espesialidade ida ne’e, oinsa ho ami-nia prezensa ida ne’e oinsa identifika to’ok potensialidade saida mak atu bele benefísiu mai ami, ba iha futuru Timor-Leste ninian atu nune’e bele fó benefísiu liliu ba iha área importante hanesan turizmu,” hateten estudante turizmu, Angelino de Jesus ba TATOLI.

Nia mós informa katak durante sei hamutuk ho komunidade, sira iha planu rua mak hanesan planu ba asaun fíziku nomós naun-fíziku.

Asaun fíziku mak sira sei ba iha fatin sira ne’ebé mak hanesan uma ki’ikoan [perumahan pondok] sira ne’ebé mak sei halo, iha tempu badak, iha tasi ibun sira.

Planu naun-fíziku nian mak sira sei realiza ba iha komunidade i mós ba eskola sira ne’ebé mak eziste iha ho tipu atividade hanesan halo sensibilizasaun, esplika lala’ok turizmu ninian, disemina informasaun ba iha juventude sira atu bele fó protesaun di’ak ba patrimóniu sira ne’ebé mak seidauk dezenvolve, maibé sai rikusoin Timor nian.

Xefe Grupu Estudante, Angelino de Jesus informa tan katak ho prezensa sira nian, sei halo serbisu interligadu ho komunidade atu nune’e bele lori sira ba iha susesu, durante sira-nia atividade ne’ebé mak la’o atu nune’e sira bele hetan referénsia balun, interligadu ho atividade balun ne’ebé mak sira hala’o iha terenu. “Atu nune’e sai hanesan bukae ida ba departamentu ami nian,” nia konklui.

Jornalista: Rafy Belo | Editór: Manuel Pinto

Imajen: Xefe Grupu Estudante, Angelino de Jesus Siqueira bainhira entrevista ho TATOLI. Foto TATOLI: Egas Cristovão