terça-feira, 24 de abril de 2018

Somotxo Neutru Hodi Asegura Seguransa Partidu Hotu

PARTILHAR

DILI, (TATOLI) - Ministru Defeza no Seguransa, José Agostinho Sequeira Somotxo deklara maski nia orijen polítika, kuadru partidu FRETILIN, maibé  tanba de’it asume kargu Ministru Seguransa no Defeza, nia hamriik neutru hodi asegura seguransa ba partidu hotu-hotu.

“Ha’u bele iha ne’ebé de’it, ha’u nia koordenasaun ba partidu sira seluk iha nafatin. Imi (jornalista sira) hotu akompaña katak linguajen hosi militante sira barak demais ne’e to’o ohin loron la hamosu konflitu boot tanba nu’udar Ministru Seguransa no Defeza neutru nafatin,” Somotxo hato’o informasaun ne’e ba jornalista sira iha Palásiu Prezidente Nicolau Lobato, Bairru Pité, Dili, tersa ne’e, bainhira hatán preokupasaun hosi públiku kona-ba ninia prezensa iha komísiu partidu balun.

Tanba de’it Neutralidade, Somotxo dehan durante ne’e nia nunka sa’e palku hodi halo azitasaun polítika ba nia partidu. Nia so partisipa de’it kampaíña FRETILIN nian, nu’udar direitu kuadru partidu nian, maibé tanba de’it asume kargu Ministru Seguransa no Defeza, nia hamriik neutru hodi asegura seguransa ba partidu hotu-hotu.

Tanba ida ne’e mak, seguransa kona-ba eleisaun antesipada la’o di’ak tebes, laiha asidente ne’ebé boot, maibé ida ne’e tanba sosiedade fó kontribuisaun pás no estabilidade, enkuantu sei iha mobilizasaun militante hosi partidu balun iha munisípiu ida hodi partisipa kampaíña iha munisípiu seluk, mak sei akontese, maski antes Somotxo deklara katak PNTL sei trava.

“Mobilizasaun militante partidu hosi munisípiu ida ba munisípiu seluk atu prevene konflitu no asidente tráfegu, maibé ladún efetivu tanba la’ós rezolusaun,” Somotxo rekoñese.

Nia esplika ne’e inisiativa ida ne’e nia halo hanesan Ministériu Defeza no Seguransa, maibé la’ós hosi Komisaun Nasionál Eleisaun (CNE-sigla portugés) ka lei, tanba ne’e laiha baze legál ida forte ba PNTL atu impoin.

Nune’e nia husu ba partidu polítiku sira tenke kontrola ninia militante iha tempu mobilizasaun hodi nune’e la bele monu ba asidente tráfegu.

Jornalista: Xisto Freitas | Editór: Manuel Pinto

Imajen: Ministru Defeza no Seguransa (MDS), José Agostinho Sequeira “Somotxo”.
PARTILHAR

Author: verified_user

Publicação luso-timorense sem fins lucrativos

0 comentários: