Independente | editorial
Be the first to comment! Eleisaun
parlamentár nu’udar eventu ida importante tebes hodi determina futuru nasaun
ida nian. Progresu no dezenvolvimentu nasaun nian bele sasukat ida ba servisu
partidu ida ka koligasaun ida ninia servisu durante tinan lima (5) nia laran
governa rai ida.
Votu ida ne’ebé povu fó ba
partidu polítiku sira ho hanoin simples de’it. Oinsá halo mudansa ba
dezenvolvimentu nasaun nian, nune’e iha futuru sira nia-oan no bee-oan sira
pelumenus bele sente netik saida mak ukun rasik-aan.
La’ós ukun-aan ne’ebé kontinua
moris iha lurón ibun hodi hais fo'er, laiha ona ema moris iha kaleen aat
nia-okos. Ukun-aan ne’ebé loron ida ema han dala tolu ona, ema hotu-hotu asesu
ba edukasaun, saúde no fasilidade públiku tomak.
Tanba ne’e dala barak povu
hakarak hili sé mak servisu di’ak liu. Iha era agora sosiedade hakarak haree
progresu reál, la’ós promesa ne’ebé halo sira bulelu. Promesa ne’ebé halo sira
laran sa’e.
Kuaze períodu tinan lima-lima,
sira sente oin halai to’o atu ‘muta’ tanba promesa oioin maka partidu polítiku
sira halo hahú husi kestaun polítika boa-governasaun to’o prosesu
dezenvolvimentu infraestrutura.
Maski nune’e, depois hetan
konfiansa saida mak akontese? Promesa ne’e hanesan buat ida ornamentu espozisaun
iha tempu kampaña. Partidu polítiku sira dala ruma la sente devér polítiku ruma
husi promesa ne’ebé sira halo.
Hafoin eleisaun saida mak
akontese? Engarrafamentu makaas iha Dili laran. Laiha fatin parajen ba karreta
foun ne’ebé barak tama iha Timor. Veíkulu hirak ne’e mai husi distribuisaun
projetu husi partidu ka koligasaun ne’ebé ukun.
Períodu hirak liu ona. Importante
ba governu ne'ebé ukun la’ós kualidade projetu, maibé importante maka
kuantidade projetu. Tanba ho nune’e, ema balun sei aproveita sai riku iha tinan
lima ne’e nia laran.
Tanba ne’e povu tenke matan moos
ona. Povu labele sai nafatin projetu foun ba partidu polítiku sira kada tinan
lima hodi utiliza para atinji sira nia objetivu.
Povu tenke brani foti desizaun ho
konxientemente katak maski ita foin sai husi post konflitu. Nasaun ne’e foin
ukun-aan. Iha prosesu luta nia-laran iha lider no partidu balun sai eroi boot,
maibé labele mós tane sira hanesan Maromak iha situasaun ne’e.
Ita hili sira tanba ita fiar sira
sei muda vida nasaun ne’e, la'ós ita hili sira tanba atu valoriza sira ninia
sakrifísiu iha tempu luta ba ukun rasik-aan. Tanba atu haree ba prosesu ne’e
Estadu fó ona rekoñesimentu boot ba sira. ITA HEIN…
Sem comentários:
Enviar um comentário