DILI, (TATOLI) - Sekretáriu Jerál
Partidu KHUNTO, José Agostinho haree katak durante períodu kampaíña
polítika ne’ebé la’o iha territóriu Timor-Leste, nu’udar jerasaun foun, nia
observa karakterístika lider na’in na’in rua hanesan Kay Rala Xanana Gusmão ho
Taur Matan Ruak. diferente tebes se kompara lider seluk.
Prezidente Partidu CNRT, Kay Rala
Xanana Gusmão, tuir Agostinho nu’udar lider ida ne’ebé akumulativu. Nune’e mós
Prezidente Partidu Libertasaun Popular (PLP), Taur Matan Ruak.
Enkuantu iha lider balun mukit
iha kapasidade akumulativu, se kompara ho lider Xanana Gusmão ho Taur Matan
Ruak.
“Xanana ho Taur Matan Ruak, sira
na’in rua nia karater akumulativu, maibé lider balun nia karater la
akumulativu, tanba ne’e fó konsekuénsia ba formasaun governu ne’ebé liu ba, hodi
ita ohin loron hakat ba eleisaun antisipada,” Sekretáriu Jerál Kmanek Haburas
Unidade Nasionál Timor Ona-KHUNTO, Jose Agostinho hato’o iha konferénsia
imprensa ne’ebé hala’o iha sede AMP bairru Grilos, Domingu, ohin.
Xanana Gusmão, Taur Matan Ruak,
sira na’in rua ema rezisténsia hotu. Xanana Gusmão tuir José Agostinho uluk
hanesan komandante xefe ba rezisténsia nian, no iha faze ukun an nia sai
hanesan xefe negosiador ba Fronteira Marítima, hafoin husik kargu nu’udar
Prezidente Repúblika, Primeiru Ministru.
Taur Matan Ruak, nu’udar jenerál
Forsa Armada, iha tempu rezisténsia hanesan vice komandante Xanana Gusmão nian.
Iha ukun rasik an asume knaar hanesan Prezidente da Repúblika no ohin loron sai
hanesan Prezidente ba Partidu Libertasaun Popular no portavós Aliansa Mudansa
ba Progresu (AMP).
Haree ba esperiénsia no
dedikasaun iha faze antes ukun an no depois ukun an, Agostinho husu atu lider
jerasaun foun sira banati tuir lider na’in tolu nia hahalok di’ak.
“Ba Xanana ho Taur durante sira
na’in rua moris, ami iha KHUNTO la iha reserva atu apoiu sira na’in rua,” José
Agostinho promete.
Iha fatin hanesan Prezidente AMP,
Kay Rala Xanana Gusmão husu ba povu, liu-liu jerasaun foun sira atu respeita
lider tuan sira nia diferensia.
“Ami husu ba imi atu respeita ami
nia deferénsia. Ami sei fó laran tomak halo esforsu tomak hodi responde ba povu
nia nesesidade hodi alkansa moris di’ak ba povu nia mehi,” Xanana husu no
promete.
Minoria submete ba Maioria
Iha konferénsia imprensa, Xanana
dehan, fundamentu hosi valor demokrátiku mak minoria tenke submete ba maioria,
tanba ida ne’e AMP kongratula povu liu-liu juventude sira ne’ebé mantein
estabilidade to’o ohin loron durante períodu impase polítiku to’o realizasaun
eleisaun antisipada.
Xanana lori Taur Matan Ruak ho
Naimori nia naran promete sei responde povu nia esperansa nune’e mós
garante estabilidade governativa hosi aspetu funsionál no temporal, hodi
hametin Parlamentu Nasionál ida seguru no Governu ida estavel.
“AMP fó laran tomak, esforsu
tomak, sei halo buat hotu hodi responde povu nia nesesidade enkuantu povu fó
fiar ba AMP atu governa iha períodu tinan lima oin mai,” Xanana haktuir.
Bainhira ukun, AMP sei konsentra
ba iha mandamentu AMP nian, garante identidade povu, halo polítika inklusiva no
rezolve problema veteranus nian.
“Se povu fó fiar iha tinan, ami
sei taka problema veteranus nian. Povu fó fiar ami sei rezolve povu nia
problema, ami komprende no ami hatene sira nia hakarak.”
Taur Matan Ruak durante
hale’u munisípiu sira, rona ona povu nia halerik. “ami sente povu seidauk moris
di’ak” Xanana hato’o sentimentu AMP.
AMP Tenke Ho Sivizmu Iha Festa
Demokrasia
Portavós Aliansa Mudansa ba
Progresu (AMP), Taur Matan Ruak apela ba estrutura no simpatizante sira hosi
baze to’o nasionál katak kampaña eleitorál to’o eleisaun antesipada hotu-hotu
tenke ho sivizmu signifika labele hatán provokasaun.
“Ami lider másimu Aliansa Mudansa
ba Progresu (AMP) hosi partidu CNRT, PLP no KHUNTO hato’o ba estrutura tomak
iha Aldeia, Suku, Postu Administrativu no Nasionál inklui simpatizante no
apoiante sira hotu katak tenke ho sivizmu eh lalika simu provokasaun hosi
partidu polítiku sira seluk.”
Militante sira hosi AMP liuliu
povu tomak atu mantein nafatin pás, estabilidade iha ámbitu kampaña eleitorál
to’o eleisaun antesipada parlamentár iha Timor-Leste.
Taur garante no fiar katak festa
demokrasia sei di’ak liu tan kompara ho eleisaun hirak ne’ebé hala’o ona iha
pasadu.
Jornalista : Zezito da Silva | Editór
: Manuel Pinto
Imajen: Xanana ho Taur iha
konferénsia Imprensa. FOTO TATOLI
Sem comentários:
Enviar um comentário