DILI,
(TATOLI) – Xefe Estadu Maior FALINTIL Forsa Defeza Timor-Leste (F-FDTL),
Majór Jenerál Lere Anan Timor, hateten instituisaun ne’e sei nafatin sei
la involve iha prátika partidu polítiku, maibé
mantein neutralidade no imparsialidade hodi garante seguransa
nasionál.
“FALINTIL-FDTL
sei toma konta posizaun ida neutral no imparsiál katak sei la involve iha
prátika vida polítika partidu nianʺ,
hateten Lere Anan Timur durante diskursu komemorasaun loron FALINTIL ba dala 43
iha Kuartel Jerál Fatuhada, ohin.
Lere
hatutan jerasaun patriota tenke la’o tuir nafatin lalaok eroi sira maka
valoriza no respeita malu.
ʺLa’o
tuir imi nia aman no inan sira nia ain fatin, hadomi malu, respeita malu,
hamutuk nafatin, hakraik án, foti ulun la’o ba futuru ida di’ak, pás, unidade
no progresu”, afirma.
Jerasaun
foun sira (F-FDTL) tenke la’o tuir ispíritu nasionalista no patriotismu,
mantein disiplina ho responsabilidade.
ʺHo
ida ne’e maka ita garante estabilidade ba ita nia rai doben Timor-Leste no povu
maubereʺ, realsa.
Majór
Jenerál ba F-FDTL ne’e fiar governu sei nafatin valoriza veteranu sira.
Komemorasaun
ne’e, instituisaun ne’e mós halo promosaun devisa ba membru nain tolu hanesan
Tenente Koronel Manuel Freitas Maubuti ba devisa Koronel, Tenente Koronel João
Pedro da Silva Ra Ria ba Koronel no Kapitaun de Fragata Higino das Neves
ba Kapitaun de Mar e Guerra.
Artigu
146 konstituisaun RDTL (Forsa Armada sira) alinea 1) Forsa Armada TL
nian, FALINTIL-FDTL, ne’ebé sidadaun nasionál de’it maka halo parte, ne’e
mak responsavel ba defeza militár Repúblika Demokrátika Timór-Leste nian no nia
organizasaun nu’udar ida mesak ba territóriu nasionál tomak.
Alinea
2) FALINTIL-FDTL garante independénsia nasionál, integridade territoriál,
liberdade no populasaun nia seguransa hasoru agresaun ruma ka ameasa externa,
ho respeitu ba orden konstitusionál.
Alinea
3) FALINTIL-FDTL labele iha partidu polítiku no rona de’it ba orgaun soberanu
kompetente sira, tuir Lei-Inan no lei, no sira labele halo intervensaun
polítiku naran ida.
Iha
2001, FALINTIL transforma ba FALINTIL-FDTL.
Jornalista:
Agapito dos Santos | Editora: Rita Almeida
Imajen:
Parada membru F-FDTL bainhira komemora loron FALINTIL ba dala 43 iha kuartel
jerál Fatuhada. Foto António Goncalves
Sem comentários:
Enviar um comentário