DILI: Deputadu Komisaun B
Parlamentu Nasionál preokupa ho atitude membru Polisia Nasionál
Timor-Leste(PNTL) ne’ebé sempre komete iha asaun krime hanesan preman.
Membru Komisaun B PN, Deputadu
David Dias Ximenes ‘Mandati’ hateten, Komisaun B PN sempre haree beibeik
atitude krime ne'ebé membru PNTL sira komete barak liu iha violasaun direitu
umanu.
Nia hateten, kazu ne'ebé foin
akontese liu ba iha Delta Nova no Bairru-Pité, ninia parte ko'alia ona ho
Komisáriu Jerál PNTL no iha tempu badak sira sei loke prosesu investigasaun.
Kuandu iha violasaun ba regra
ne’ebé povu halo, polisia tenke lalais atua hodi mantein orden, nune’e mós iha
agresaun fíziku ruma komandu PNTL tenke orienta ninia membru sira atu hapara
agresaun fíziku ne’e.
Mandati hatutan, karik iha
atuasaun ne’ebé PNTL halo mak ema ruma hasoru fali ho rezisténsia, entaun bele
iha desmobiliza asaun ruma hodi hasoru ema ne'ebé halo rezisténsia ne’e.
Maibé ema la halo rezisténsia
hasoru PNTL derrepente de’it mosu asaun brutalizmu husi membru PNTL, entaun
ne’e sala, Bele dehan ne’e krime violasaun no komandu PNTL tenke responsabiliza.
La’ós mosu tiha asaun krime
ne'ebé membru sira komete depois komandu hateten laiha buat ida. Ne’e kategoria
ona violasaun tanba subar membru ne'ebé halo krime, sa tan sira ne'ebé halo
violasaun ne’e laiha identidade.
Mandanti reforsa tan, polisia atu
hala’o servisu iha ne’ebé de’it tenke aprezenta ninia identidade ba povu, la’ós
subar fali identidade depois halo tiha krime halai subar.
Komisaun B husu beibeik ona atu
komandu PNTL kria asaun vizibilidade. Membru sira tenke iha terrenu beibeik
para povu mós bele koñese sira, atu sira mós bele direita akompaña situasaun,
maibé komandu nunka halo ida ne’e.
Tomé Amado | Independente
Sem comentários:
Enviar um comentário