DILI, (TATOLI) – Hodi
kontribui ba dezenvolvimentu komunikasaun sosiál iha Timor-Leste, Universidade
Dili (UNDIL) sei realiza semináriu ba jornalista sira ho oradór hosi Indonézia
no rai-laran.
“Ne’e hanesan meiu para konserva
idea, dezenvolve área komunikasaun, informasaun ne’e importante, tanba agora
mundu ida la’ós de’it nasaun maka kontra malu maibé informasaun bele habot no
hakiik situasaunʺ, tenik Reitór UNDIL,
José Agostinho da Costa Belo, ba jornalista sira hafoin sorumutu ho Sekretáriu
Estadu Komunikasaun Sosiál, Mericio Juvenal dos Reis Akara, iha Palásiu
Governu, ohin.
Tuir reitór nia haree
dezenvolvimentu mídia hahú buras, maibé públikasaun notísia hamosu
desentendementu iha públiku nia leet, ho razaun ne’e UNDIL planeia semináriu
hodi hasa’e koñesementu jornalista sira.
Nia dehan parte universidade
kontaktu ona oradór sira hosi Indonézia mak TV ONE (televizaun privadu) no
matenek nain balun iha área komunikasaun sosiál.
Alende ne’e, ninia parte mós halo
hela esforsu atu kontaktu lider nasionál, Kay Rala Xanana Gusmão no timoroan
seluk. Nia afirma kuandu semináriu ne’e la’o di’ak presiza servisu hamutuk ho
SEKOMS.
Parte governu, Mericio Juvenal
dos Reis Akara, hateten apresia ho planu universidade nian hodi kontribui ba
dezenvolvimentu komunikasaun iha TL.
“Planu hirak ne’e ami apresia no
hanoin para iha kolaborasaun oinsá hodi realiza atividade ne’eʺ, katak.
Jornalista: Agapito dos Santos | Editora:
Rita Almeida
Imajen: Reitór UNDIL, José
Agostinho da Costa Belo, ba jornalista sira hafoin sorumutu ho Sekretáriu
Estadu Komunikasaun Sosiál, Mericio Juvenal dos Reis Akara, iha Palásiu
Governu, ohin. Foto Egas Cristovão
Sem comentários:
Enviar um comentário